Archive for the ‘Poetry’ Category

ਨਰਸ ਮਾਂ…

ਦਸੰਬਰ 20, 2014

ਸਵਰਨਜੀਤ ਸਵੀ

ਬੈੱਡ ਉੱਚਾ ਕਰੋ
ਨੀਵਾਂ ਕਰੋ
ਬਿਠਾ ਦਿਓ – ਸੁਆ ਦਿਓ
ਮੈਨੂੰ ਯੂਰਿਨ ਆਇਆ
ਸਟੂਲ ਪਾਸ ਕਰਾਓ
ਮੇਰਾ ਗਲ਼ ਸੁੱਕ ਰਿਹਾ – ਪਾਣੀ ਦਿਓ
ਚਾਹ ਠੰਡੀ ਹੈ – ਮੈਂ ਨਹੀਂ ਪੀਣੀ
ਆਹ ਕਰੋ – ਅੋਹ ਕਰੋ
ਮੈਨੂੰ ਘਰ ਜਾਣ ਦਿਓ
. . . . . . .
ਕਿੰਨੇ ਸੁਆਲ ਬੱਚਿਆਂ ਵਾਂਗ ਕਰਦੇ ਹਾਂ ਅਸੀਂ
ਹਸਪਤਾਲ ਦੇ ਵਾਰਡ ‘ਚ
ਗੱਲ ਗੱਲ ਤੇ ਚੀਕਦੇ – ਕ੍ਰਾਹੁੰਦੇ
ਆਪਣੀ ਜ਼ਿੰਦਗੀ ਦੇ ਬੀਤੇ ਨੂੰ
ਉਜਾਗਰ ਕਰਦੇ
ਆਪਣੀ ਹਉਂ ਨੂੰ ਪੱਠੇ ਪਾਉਂਦੇ … …

ਤੇ ਨਰਸ ਕਿੰਨੇ ਸਹਿਜ ਨਾਲ
ਹੱਲ ਕਰਦੀ ਹੈ ਸੱਭ
ਨਾ ਚਿਹਰੇ ‘ਤੇ ਕੋਈ ਸ਼ਿਕਨ

ਨਾ ਹੱਥਾਂ ‘ਚ ਕੋਈ ਝਿਜਕ
ਨਾ ਦੇਰੀ ਕਿਸੇ ਕੰਮ ‘ਚ
ਤੇ ਇਸ ਤੋਂ ਇਲਾਵਾ
ਉਹ ਵੀ ਹੱਲ ਕਰਦੀ
ਜੋ ਨਾ ਜਾਣਦੇ ਅਸੀਂ
ਕਦੇ ਬੀ. ਪੀ. ਚੈਕਅੱਪ
ਕਦੇ ਈ. ਸੀ. ਜੀ
ਕਦੇ ਦਵਾਈ
ਕਦੇ ਟੀਕ
ਜਗਾਉਣਾ   ਧੁਆਉਣਾ
ਚਾਹ ਪਿਲਾਉਣਾ
ਖਾਣਾ ਖਿਲਾਉਣਾ
ਚਮਚੇ ਮੂੰਹੀਂ ਪਾਉਣਾ
ਸਾਡੇ ਤਨ ਮਨ ਦੀ ਹਰ ਹਰਕਮ ਮੁਤਾਬਕ
ਢੁੱਕਦਾ ਇੰਤਜ਼ਾਮ ਕਰਨਾ
… … …
ਏਨਾ ਕੁੱਝ ਤਾਂ
ਮਾਂ ਵੀ ਨਹੀਂ ਕਰਦੀ ਹਰ ਵੇਲੇ …
ਇਹ ਮਾਂਵਾਂ ਧੰਨ ਨੇ
ਅੱਧਖੜ ਬੁੱਢਿਆਂ ਦੇ
ਬੱਚਿਆਂ ਵਾਂਗ ਕੀਤੇ
ਸਭ ਸੁਆਲਾਂ-ਜ਼ਿੱਦਾਂ ਦੇ
ਹੱਲ ਕੱਢਦੀਆਂ ਨੇ
ਬਿਨਾਂ ਲੋਰੀ ਦਿੱਤਿਆਂ ਹੀ …
ਇਹ ਨਰਸਾਂ ਮਾਂਵਾਂ
ਰਿਸ਼ਤਿਆਂ, ਜਾਤਾਂ, ਪਰਿਵਾਰਾਂ
ਦੇਸ਼ਾਂ-ਕੌਮਾਂ ਤੋਂ ਪਾਰ
ਸੱਭ ਸਾਂਭਦੀਆਂ
ਇਹ ਗਲੋਬਲ ਮਾਂਵਾਂ … …

ਨਵੰਬਰ 3, 2010

 

 

 

 

 

 

 

 

 

 

 

 

 

 

 

 

دیہی ناد

 

سورن جیت سوی

 

اُلتھا: محمد آصف رضا

١

تُوں جو وی ہیں

دیہہ، آکار، نِراکار

آدمی، عمارت، کھِڈونا، خُدا

خاک، کھنڈر، دھرت، اسمان

شبد، دُھنی، لیک

توں جو وی ہیں

پنچھی، سورج، لالی

سویر شام

خوشی اُداسی

اُڈان چُبھّی

توں جو وی ہیں

حرکت، ہنیر، روشن

سوخم ستھول

جو وی ہیں

میریاں اکّھاں راہیں اُتّردا

میرے دِماغ دا سِرجیا

عکس ہے ماتر

 

تے میں جو وی ہاں

تیرے وِچوں بنیا اُنیا اُگمیاں

عکس ہاں تیرا

 

 

٢

 

میں تیرے کول آؤندا ہاں

جِسم دا روم روم

پبّاں بھار ہو تکّدا ہے

جِویں چُمبک نُوں

اُتاولے ہو مِلدے نے لوہ کن

 

تینوں تکّنا چھوہنا

میرے اندرلے پانیاں نُوں

لَے  ،چ وگن لاؤندا ہے

توں بن جاندی ہیں

سنگیتک دیہی

برہِمنڈی آرکَیسٹرا

 

جِتھے وی

تکّدیاں نیں اکّھاں

چھُوہندے نیں پوٹے

بھکھدے نیں ساہ میرے

گھُٹّدے نے اِک دُوجے نوں احساس

نِکلدیاں نے اوتھوں

لِشکدی تپدیاں وہِندیاں

ویگ متّیاں دُھناں

پھَیل جاندیاں نیں ساڈی کائنات وِچ

کہ میں اِنج ہی

تیرے ہر ساز دی

ہر سُر نال اِک مِکّ ہو کے

نویں راگاں دی

سِرجنا کرنی ہے

بار بار تا عمر

اے سنگیت دیہی

 

 

 

٣

 

سپرش تیرا

میرے تن تے

کِتے وی

بِہبل کر دیندا ہے

سمُندر اندر وگدیاں ندیاں نوں

ساہاں دی گتی نوں

پنچھیاں دی پرواز نوں

پوناں دی آواز نوں

 

چُمّن تیرا

اوس کل کل کردے پانی نوں

نیاگرا فال وانگ

گتی دیندا ہے

ویگ متّی انّی شکتی

تے میرے انگ انگ  ،چ

پُھلّ کھِڑنا شروع ہوندا ہے

میں دیکھدا ہاں اودوں

ڈوڈیاں نُوں

گتی نال ودھدیاں

کھِڑدیاں

پتّیاں نوں

پُورا کھِڑیا پُھلّ بندیاں

…    …    …    …

اوہ پل ہے بس

جو میں

تیرے  ،چوں لبھّدا ہاں

پھرولدا ہاں

بار بار

 

 

 

٤

 

میں

تیرے جِسم دی کتاب دا

آخری حرف لِکھن  ،چ مصروف ہاں

پر ایوں لگدَے

کہ اجے تاں میں

شُروعات ہی نہیں کیتی

کوئی حرف نہیں لِکھیا

اجے تاں میں

اوس حرف دی آئت  ،چ اُلجھیا ہاں…

 

تیرا جِسم سیمت ہے

پر اوس دے اندر باہر سبھ اسیم ہے

میں

تیرے انگ انگ تے

آپنے احساساں دے حرف لِکھے نیں

اَتے تیرے احساساں تے

آپنے انگ انگ نوں کھِلار دِتّا ہے…

 

مینوں لگدَے

کہ توں اسیم ساغر ہیں

تے میں

تیریاں چھلاّں  ،چ کھیڈدا

تیریاں چھلاّں  ،چ اُلجھیا

تیریاں چھلاّں توں ڈریا

اِک بال ہاں ماتر

لگدَے کہ

پنچھی سُپنا تے جال

سدا  نال نال رہندے نیں

 

اُنج میں

تیرے جِسم دی کتاب دا

آخری حرف لِکھن  ،چ مصروف ہاں…

 

 

 

٥

 

تینوں چھوہندا ہاں

بند اکّھاں نال

اندر میرے تَیردی ہے

لہردی مٹکدی

ہری پرساد چورسّیا دی چنچل بنسری

 

من دی دھڑکن

تھِرکدی ہے

شِو کُمار شرما دے سنتور  ،چوں نِکلیاں

جھرنے ورگیاں چنچل سُراں وانگ

میں

منتر مُگدھ ہاں

تیرے تن دِیاں راگنیاں وِچ

گُھمدا ہاں

تیری کایا

تیری مایہ وِچ

تیریاں ہرنوٹیاں رِیجھاں دا ولیا

آپنے اندرلے لاوے دا ڈسیا

مُکت نہیں ہوندا

پل دے ہزارویں حِصّے  ،چ وی

 

میں چھوہندا ہاں تینوں

بند اکّھاں نال۔

 

 

 

٦

 

میرے من دا ماروتھل

تپدا ہے

بُھکّھ تے پیاس

اوس دی مرِگ ترِشنا

جنم مَرن

انت چکّر

برہِمنڈ

تپدے اندر دے سبھ گرہِ

بسّ

کمل دا کھِڑنا ہے

کہ سبھ

ماروتھل توں تھل

تھل توں جل

پران ساہ شکتی

تے اُگّدی ہری کرونبل

ایہی سبھ تاں ہے

کہ میں جِیوندا ہاں مردا ہاں

بار بار

 

 

 

٧

 

جیوں جیوں

کجّناں وستراں

تے پردیاں دی چھاں

تیرے جِسم تے ہوندی گئی

میں

قُدرت توں

اِک سہج آکرشن توں

وِراٹ نگن ساغر توں

محروم ہوندا گیا

سِمٹدا گیا

تے میں سہج نہ رہیا

توں پراکِرتک نہ رہی

تیرا آکرشن

سبھ کجّناں توں پار

اُگھّڑدا رہیا

اُکساؤندا رہیا

تے میں

تیرا سہج بھوگی

من  ،چ بھوگدا ہاں تینوں

سبھ اِندریاں دِیاں کُلّ شکتیاں سمیت

 

٨

 

میں نچّدا ہاں

تیرے لئی

وِراٹ تانڈو

کہ تیرے بِناں نہیں ممکن کُجھ وی

سِرجن وِسرجن جیہا

کہ میں

تیرے توں بِناں

کِریا پرکرِیا دی

یُدّھ بُھومی توں وِّچھڑ گیا ہاں

تیرا ہونا ہی

بھردا ہے

تیرے میرے اندرلے خلاء نوں

کہ جس وِچ

ساڈی رِشتگی دے انو سنچار کردے نیں

میں کُجھ نہیں تیرے بِنا

توں کیہ ہیں دسّ میرے بِنا

 

 

 

٩

 

توں نگن سی

ندی پہاڑی

ٹاہنی کلی

دُھپّ چھاں ورگی

تاں میں

آپنیاں اِندریاں دی حاضری

محسوس نہ کیتی اُچیچ

توں تے میں

مہینتم انوناں جہے

بیج رُوپ کِسے وی رُوپ دے

تُر پئے جدوں توں

من مِتھیاں ترنگاں دی لیہ تے

سِرج بیٹھے

آپنی دُنیاں

رِشتیاں

ارتھاں انرتھاں

دے کجّن پا پا کے

توں نگن توں

اِک کمبدی لرزدی

سوخم پاردرشی

چادر جیہی ہو گئی

تاں میریاں

شکتیاں

سبھ اِندریاں دے دُھر اندروں

مہینتم انُوں

آپنا رُوپ چھڈ بیٹھے

تیرے نگن نوں تلاشدے

چادر دے ہیٹھوں

بے قراری وِچیں گُزردے

بِہبل جہے رہندے

لبھّدے

چادر دے ہیٹھاں وگدیاں لہراں

کہ ہُن میں پرتنا نہیں

تے نہ ایہہ ممکن لگدا ہے

 

 

 

١٠

 

میں پربت

توں برف دی چِٹّی بارِش

لِپٹ رِہا میں

پل پل

تیری محبت دے چُمّنا وِچکار

ٹیسی توں چھا رہی

میرے چُفیر

میرے من دے لِنگ تے

تیرے احِساساں دے بیجاں دی ستھاپتی

اے دودّھ یونی

 

 

 

١١

 

پیار کردا ہاں

تردا ہاں میں لہراں

وہِندا ماندا

چشمیں دودّھ دے

بُھکّھ دے

تے سُکھ دے نیں ایہہ

اے رادھا! رَتّی! ہے ماتا

کِنّے رُوپ نے تیرے

ورچاؤن دے

پرچاؤن دے

 

تیری ہر تال تے

میری بنسری نچّے

تے مینوں بہُت کُجّھ دسّے

کہ توں ہی ہیں

میری اگیانتا دی سُرنگ اندر

لٹ لٹ بلدا

گیان دا دِیوا

تیرے وِچوں

تیرے اندروں

ہر یاترا کردا

میں لبھّدا ہاں تے لیندا ہاں :

روشنی گیان شکتی

 

ہر وار

بہُت کُجھ رہ ہی جاندا ہے

پھِر میں آؤندا ہاں

وِچھاؤندا ہاں

آپنے پیار دی چادر

توں آ

میری چادر نوں آپنی مخملی چھوہ دیہہ

تے مینوں روشنی دے دیہہ

کہ میں بھریا نہیں اجے

رَتّی

اُما

رادھا

میرے پیار دی ماتا

 

 

 

١٢

 

جاندا ہاں میں

انگ انگ … روم روم

آپنیاں سیماواں

تیری اسیمتا

میرا اینویں ڈُلّ جانا

تیرا سمو لینا سبھ کُجّھ نوں

تے بہُت کُجّھ سِرج دینا

 

جاندا ہاں

بہُت کُجھ

جاں کُجھ وی نہیں

تیرے بارے

آپنے بارے

ساڈے بارے

کہ میں آؤندا ہاں تیرے کول

تیبر جگیاسا نال

چلا جاندا ہاں شانت ہو کے

پھِر آؤن لئی

نویں تیبرتا نویں جگیاسا نال

کیہ ہے ایہہ رہسّ

کہ بہُت کُجّھ جاندا ہاں

تے کُجھ وی نہیں جاندا

 

 

 

١٣

 

اجے ہُنے تاں

میں مصروف ساں

تیرے جِسم دی سترنگی وِچ

تیرے بُلھاں دے اَنہد راگ وِچ

 

اجے ہُنے تاں

اسیں تَیر رہے ساں

ستّاں سمندراں توں وکّھرے پانیاں وِچ

 

اجے ہُنے تاں

دِسدا سی

ساڈے اندر باہر پھیلیا کوئی عجیب جنگل

 

اجے ہُنے تاں سی

ساڈے دوآلے

کِسے ناگ دی پرِکرما

 

اجے ہُنے تاں

اوہ سبھ ساڈے نال سی

ساڈے انگ سنگ سی

جو گرم لاوے جیہا سی

 

تے ہُن ایوں لگّدَے

کہ جِسم عجیب چیز ہے

ساڈے ساہاں  ،چ نیرستا ہے

ساڈے انگاں  ،چ

اگّ ورگا کُجھ وی نہیں

اسیں گڑُچّ نہیں

سگوں اِک دُوجے توں ڈر رہے

دُور دُور کھِسک رہے ہاں

 

اجے ہُنے تاں کیہ سی

تے ہُنے ایہہ کیہ ہو گیا؟

 

 

 

١٤

 

توں تے میں

جِسم ساں

میں مرد  توں عورت

تیری ضرورت

ساڈی اِچّھا سبھ ہان پروان

اسیں مِلدے

جُڑدے بھوگدے ماندے…

تیری میری بھاشا

ساڈے جِسماں دی زُبان

…      …      …

پھِر شبد آیا

بھاشا دے اُبال دی آواز

توں تربھکی

میں ڈولیا

اِک گونج سی

…      …      …

تے اسیں

توں تے میں توں

مرد تے عورت توں

ماں   پیو   پتنی   بھین بھرا …

تے ہور کِنّے ہی سنبودھناں وِچ اُلجھ گئے …

اسیں

سبھیک ہو گئے!

سماجک ہو گئے!

سماج

جو سیما ہے

ترتیب ہے

جو گھڑیا اُنیا سی

ہُنے میں ہاں

تینوں سبھ ولگناں ٹپّ کے مِلدا ہاں

ولگناں

جو اسیں آپ سہیڑیاں …

…      …      …

توں ہیں

کہ پیار لئی

ارپ دیندی ہیں سریر

میں ہاں

جِسم لئی

سواد لئی

دیندا ہاں پیار …

 

ہُن اسیں ہاں

کہ آپنیاں ہی پائیاں

بیڑیاں دا بھار جھلنوں اِنکاری ہاں

 

اسیں ہُن وی اوہی ہاں

پر اسیں ہُن

اوہ ہو نہیں سکدے …

 

 

١٥

 

ماندا ہاں

نرِت لہراں سنگیت

تَیردا ہاں

ادبھُت سمندراں  ،چ

اُڈاریاں ماردا ہاں

وکّھرے اسماناں وِچ

تینوں سمجھن دی لَے وِچ

پھڑنا چاہوندا ہاں

تیرے وِچوں

نرِت  اداواں

پر ہتھ وِچ آؤندا ہے

سمُندر دے تل دا پانی

جدوں وی پھڑدا ہاں لہراں

 

ہتھ ٹِکدے نیں تیرے جِسم تے

رُکّ جاندا ہے سبھ کُجّھ

چھوہ وِچوں

پھِر اُپجدا ہے

کُجّھ نوَاں سرسراؤندا

پھِر تَیردا ہاں میں

لہراں وانگ۔

 

 

 

 

١٦

 

اینیں دِنیں

توں نہ مِل مینوں

کہ ایہنیں دِنیں میرے لئی

سڑک   سواد

شام   سنواد

سویر   سنگ   شِشٹاچار

سبھ جِسم ورگا ہے

سبھ

مخملی جامنی رات ورگا

پھیلدی کائنات ورگا

من دے راگ جیہا

اَنہد ناد جیہا …

 

تینوں

چنگا لگّے… نہ لگّے

پر میں تاں

ایہنیں دِنیں

اِس طرح دا ہاں

کہ توں نہ مِل مینوں…

 

١٧

 

توں کَینوس ہیں بھاگ بھری

جیوں دھرتی

پانی   اگن

ہوا تے پربت نال شِنگاری

ادھ کُوآری اُپجاؤ

میری کَینوس توں

چھوہاں لاواں بُرش نال میں

رنگاں نال ترنگاں

احساساں نال بھریاں

سُپنے رنگیاں چھوہاں

توں چھوہاں نُوں سہِندی

کمبدی

لرزدی

تے پھِر اُپجدی

کرُنبلاں

ڈوڈیاں

تے پتّ کچور ہرے

توں اُپجدی

میرے سُپنیاں دی تعبیر

توں میری

ساری عمر دی

سبھ توں ودھیا کَینوس

میری سبھ توں چنگی پینٹِنگ

وار وار

میں رنگ بھراں

چھوہاں نال جذباتاں

پھِر چھیڑاں تیرے تن دِیاں طرباں

سوہے راگاں دی کوئی راگنی

میں واہاں لیکاں

پھِر ڈھاہ دیوَاں

پھِر ہور بھراں میں رنگ

…      …      …

نہ تُوں بھردی

نہ میں تھکّدا

توں کَینوس میرے ہان دی

 

 

 

١٨

 

رادھا

جنوُن عِشق

تیز وگدی ندی

سُچجی شوکدی سویر

دِل دی بنسری تے تھِرکدا سوہا راگ

پُھلّ تے پئی کُوآر تریل

 

رُکمنی

ساغر

تپ

یوگ

 

تے میں

وِچکار بھٹکدا ویگ

ہنبھیا   تھکّیا

اکّیا

اُداس شِلالیکھ

 

 

 

١٩

 

میں تیرا ہاں

موت وانگ نہیں… کِسے راحت وانگ

اُداسی نہیں

گرم کوسی گلوکڑی ہاں، میں تیرے لئی

سبھ کھونجیاں توں سمیٹ کے

چاہیا ہے

سوَے نوں تیرے سپُرد کرنا

تیرے انگ انگ تے

چُمّنا دے مینہہ وانگ ورہنا لوچیا ہے

تیری دھرت تے

کِسے پودے وانگ اُگّن دی رِیجھ ہے میری

تیرے کول ہاں تاں ہَریا بھریا ہاں

دُور ہاں تاں

نِسّتا جیہا سریر ہاں بسّ …

 

 

 

٢٠

 

میں تیرے وِچ ایوں وسنا چاہوندا ہاں

جِویں پتھّراں  ،چ چُپ ہوندی ہے

جِویں پُھلّ پتّیاں  ،چ

ہوا دی سرسراہٹ ہوندی ہے

جِویں سُر کیتی سارنگی  ،چوں لنگھدیاں

گاؤن لگّدی ہے ہوا

جِویں تھیہ وِچ

سمائے ہوندے نیں گھر گھڑے سِکّے

جِویں انب بارے سُندیاں ہی

مِٹھاس نال بھر جاندی ہے جِیبھ

جِویں کھنڈر دِیاں پِلیاں اِٹّاں  ،چ

سہِکدی رہندی ہے اِک چیخ

جِویں بھری ہوندی ہے

نفرت، محبت تے اُداسی نال

رَیک وِچ پئی کتاب

جِویں وسی ہوندی ہے

تیرے سپرش توں پہلاں ہی

سِرہن بھری سرگوشی

کہ جِویں

شبداں  ،چ چھُپّ کے بیٹھدا ہے

وِسفوٹ

کہ جِویں بدّلاں تے پتھّراں  ،چ

چھُپے رہندے نے انیکاں آکار

میں تیرے وِچ اِنج وسنا چاہوندا ہاں

جِویں خلاء  ،چ وَسِّیا ہوندا ہے

شبد

برہِمنڈ

تے دُھنیاں دا سنسار

 

 

 

٢١

 

اوس نے

بانہاں پھیلائیاں

میں

مرد بن کے اوس دِیاں باہاں ،چ سی

اسیں ہان دے ساں

ساڈیاں اکّھاں دے اندر

پیار دِیاں چھلاّں ماردا

چنہاں تَیردا سی

…      …      …

اوس نے

میرا سِر گودی  ،چ رکّھ کے

مِٹھّی مِٹھّی لوری سُنائی

تھاپڑِیا

متّھا چُمّیاں

تے میں

نِکّڑا بال بنکے سوں گیا  گودی  ،چ ہی…

 

 

 

٢٢

 

آدم تے حوا

تاں نہیں ہاں اسیں

تے اِنج ہو وی نہیں سکدا

اوہ رس

تے ساڈا چھڑینتر

جِسماں توں پار جان دا

جِسماں نوں ورت لین دا

تے پھِر

ایہناں دے احساس توں مُکت ہون دا …

سبھ سُچیت جیہا

گھڑیا جیہا لگدا ہے

کِسے کمزور جیہی غزل دے کرافٹ ورگا

 

اسیں

آدم تے حوا تاں نہیں ہاں

تے اِنج ہو سکنا

ساڈی ہونی دی

سِیما توں دُور دی گلّ ہے…

 

 

 

٢٣

 

تیرا

اوس گلّ دے ذِکر توں

اوس دے احساس توں

تربھک جانا

تے ہولی ہولی

میرے سینے نال سِر لا کے

اوس اِک پل توں

پہلاں دے سبھ پلاں لئی

رضامندی دینا

تیری معصومیت

تے بھولے پن توں سِوا کیہ ہے بھلا؟

 

میں آکھیا   تیری اِچّھا

توں منگیا تلِسمی چِراغ

میں دے دِتّا

توں رگڑیا

تیریاں اکّھاں  ،چ

ابھِنیتری ورگے سُپنیاں دا سنسار جاگیا

‘حُکم میری آقا ‘

تے تُوں

بُلندیاں چھوہ رہی سَیں

تیرا نام

تیریاں تصویراں

تیرے ہی سُپنے

لوکاں دی تقدیر بن گئے…

…      …      …

پھِر

پتی   بچّہ   گھر بار   چھوٹا سنسار

…      …      …

اودوں توں

میریاں بانہاں  ،چ سَیں

تیریاں اکّھاں

گہِرائیاں   گولائیاں

مُسکراہٹاں   تھرتھراہٹاں

مِٹھّیاں مِٹھّیاں کمبنیاں

گرم کوسے احساس

اِک مِٹّھا راگ

پھِر گرم لاوے دا وگنا

اوہ سبھ میرا سی

تے اوہ چِراغ تیرا سی …

…      …      …

توں خوش سَیں

سُپنیاں دے چِراغ رگڑکے

میں خوش ساں

جِسم دے راگ  ،چ گُوآچکے

تھوڑے جیہے فرق نال

اسیں اِکو جیہے ہی بھوگی ساں …

 

 

 

٢٤

 

تُوں تاں منگیا سی   اِک پل

پر میں تاں

کر دِتّا آپنا سبھّو کُجھ تیرے ناں

سبھّو کُجھ

میں جس طرح دا وی ہاں

ادّھ   پچدّا

ادّھو رانا   ادّھکھڑ

ادّھوگتی حرکت  ،چ وِچردا   تیرا ہاں

سمیت آپنیاں

کمزوریاں   چِنتاواں دے

سبھ اَنتر دوندھاں دے

آپنے من دی

پُوری   ادھوری

لِکھی   ادھ لِکھی کتاب سمیت …

 

 

 

 

٢٥

 

جد وی میں

تینوں دیکھدا ہاں

تاں میری رِشتیاں دی گُتھلی چوں

کِر جاندے نیں

سبھ رِشتیاں دے ناں

رہ جاندا ہے

اِک نام

عورت

 

جوان

بھرپُور

میری رِیجھ دی عورت

تے میرے خیالاں دے کھنبھ

حلقے نیلے جامنی ہو کے اُڈّدے نیں

اوس لوک ولّ

جِتّھے اسیں

سبھ کُجھ توں نوِرت ہو کے

صِرف اِک پل  ،چ قید ہاں

صِرف اِسے چھِن  ،چ

آباد ہاں

بھرپُور ہاں …

 

 

 

٢٦

 

اجّ کل میں

تُہاڈی بھاشا وِچ

اشلیل سوچن والا بندہ ہاں

میں اج کل

اِکّو پل  ،چ قید ہاں

اوس پل دے

اندر دی وِشال دُنیاں

میریاں سوچاں دا تھیم ہے…

 

کام

کرودھ

لوبھ

موہ میرے انگ سنگ نیں

نِربھؤ تے نِروَیر رہنا

میری کُل ذات دے اُوس پل توں

بہُت دُور دی شَے ہے…

 

میں سوچداں

کہ پل اینا وڈّا وی ہوندا ہے؟

کہ کِنّے ہی ورھے

اوس پل تھیں لنگھ جان

جاں ایہہ کہ

پل دی دُنیاں  ،چ

کِنّا کُو اَنتر ہے؟

 

 

 

٢٧

 

تینوں دیکھدیاں ہی

سبھ تُچھّ جیہا لگدا ہے

ایہہ دوالا

ایہہ لوک

ایہہ سماج

 

تے میرے اندر

مچّ اُٹّھدا ہے

سوہا گرم لاواں

تے وجّ اُٹّھدا ہے

وِشاد ناد!

 

 

 

٢٨

 

جیوں جیوں میں

عُمروں کِر رہیا ہاں

کیندرِت ہو رہیا ہاں

آپنیاں اِندریاں دوآلے …

 

کُجھ کھُسّ جان دا

کُجھ گھٹّ جان دا ڈر ہے

تے بہُت کُجھ پا لین دی ریجھ

کہ میری

ہر اِندری

وِراٹ رُوپ اختیار کر گئی ہے

 

میریاں سوچاں

میرے کرم

سبھ عجیب دِشا ولّ تُر پئے نیں

…      …      …      …      …

لگدَے

میں ٹُٹّ جاواں گا

اِسے پل

بسّ! آؤندے ہی پل …

 

٢٩

 

میں بھر گیا ہاں

عورتاں نال

جِسماں نال …

 

میرے دوآلے

اِک لکیر جیہی ولی گئی ہے

مچّدی اگّ دی

سُوہی لکیر

میریاں سوچاں

صِرف ورجِت ولّ بھجّ رہیاں نیں…

 

اِس پل میں

صِرف لِنگ ہاں

آپنے ویگ  ،چ رُجھّیا

میلدا

کھیلدا…

 

 

 

٣٠

 

اِس پل

میں صِرف احساس ہاں

گڑُچّ جِسماں وِچّیں

گُزردے راگ ورگا

اُٹھّدی بھاف ورگا

آنند وِشاد ورگا…

 

اِس پل

میں

اوس پل دا

احساس ہاں ماتر…

 

 

 

٣١

 

اِس پل

میں اوہ ہاں

جو میں اکثر نہیں ہوندا

میرے من دے خیال

ورجِت سیماں  ،چ گُھم رہے نیں

میرا جِسم

وِسپھوٹ ہون توں

اِک پل پہلاں ورگا ہو گیا ہے…

 

بیوی

کوئی تُری جاندی کُڑی

جاں محبوب عورت

سبھ

اِکّو ہی احساس وانگ نیں

سبھ

اِکّو ہی لگدا ہے

 

 

 

٣٢

 

دو جسم نیں

دوویں مِل رہے نیں…

 

اِک تیلی

کِدھروں ڈِگّی

اِک چنگیاڑی بلی

اِک جِسم بُجھ گیا   ڈر گیا

پر دُوسرا ہے مگھ رہیا…

 

جِسم مِل رہے نیں

پر انگ

اچانک نِگھّے توں

چِپ چِپے ہو گئے نیں

دِماغ دِیاں ناڑاں کسیّاں گئیاں…

…       …       …       …

تے اوہ اِک چھِن

کئی ورھیاں لئی

جِسم نوں

نہ مرد کر گیا

 

 

 

٣٣

 

اُنج دوآلے بھیڑ سی

سبھ کُجھ کھچاکھچ سی

تے میں وی

سماجک جیو ورگا کُجھ…

 

پر جدوں توں

اچانک میرے ساہمنے سی

تاں میرے لئی

چوپاسیں صِرف توں سی

تے اوسے پل

تیرے جِسم توں

وستراں نوں اُتاریا

انگاں نوں نِہاریا

پلوسیا بھوگیا…

 

حیران ہاں

نہ اِس بھیڑ نوں کوئی عُذر ہویا

تے نہ ہی

تیرے بھاواں  ،چ کوئی تبدیلی

توں ہُن وی

اوپری نظر ے ویکھ رہی سَیں

پر جو

درمیان دا پل

میں تیرے توں چُرایا ہے

تیرے سنگ ہنڈھایا ہے

اوہ صِرف میرا ہے

تے تُوں…

اوہو اوپری عورت!!!

 

 

 

 

٣٤

 

ہووےگا اِنج ہی

کہ جِتّھے وی

ساڈا عِشق متّا

خُون پسینہ ڈُلّھے گا

دھرتی ہو جاوے گی ہور وی زرخیز

پیدا کرے گی

پُھلّ ٹہِکدے

پنچھی چہِکدے

ہواواں مہکدیاں

سُنیہے پیار دے

…       …       …       …

ہووےگا اِنج ہی

کہ ایہہ جو

لہو دے رنگ دے فرق دی

کتھا جاری ہے   پشو کتھا

ایہہ تھمّے گی

ختم ہووے گی

سبھ توں پہلاں

اوس تھاں توں

جِتّھے ڈُلّیگی

ساڈے عِشق متّے خُون پسینے دی پہلی بُوند

آ  !

کہ آپاں کھِلار دئیے

بُوند بُوند آپنی

ساری دی ساری دھرتی تے

 

 

 

٣٥

 

نیلی تیز روشنی

اکّھاں چُندھیاؤندی

من

جیوں خرگوش چھڑپّے لاؤندے

کُدّ کُدّ جاندے

مِدّھ مِدّھ جاندے

آپنے ہیٹھلی زمین …   …

نیم نیلی روشنی

کولی سڑک

ریشم دا جھُولا

ہتھ ہولی ہولی تُردا

ریشم دی سڑک تے

اکّھاں بند

مند مند مُسکُراؤندیاں

تَیردیاں نیں وِچ ہوا دے

من تَیرے جیوں

دھیمی سُر دے گیت اُتّے

…       …       …

ہتھ تَیردے

من مُسکاوے

مدھم مدھم

نیل ندی   جیوں نشہ گُلابی

دھیمے دھیمے چڑھدا

لرزے وِچ ہوا دے

جیوں کوئی تند

راگ چُرا کے تُردی کِسے ساز دے کولوں

تُردی ہولی ہولی

مٹک مٹک کے … لرز لرز کے

 

 

 

٣٦

 

کوتا!

میں نہیں چاہوندا

وار وار تیریاں میڈھیاں وِچ

اوہی گھسے پُرانے بِمب ٹنگنے

نہیں چاہوندا میں

وار وار کرنا ذِکر

گوتم سِدھارتھ دا

رام تے راون دا

نہیں کھِچّنی چاہوندا میں

ایہناں درمیان کوئی لچھمن ریکھا…

 

مینوں احساس ہے

کہ ہُن توں

چغلے بِمباں دا بوجھ نہیں جھل سکدی

نہیں چِترنے چاہوندا میں

تیریاں اکّھاں ساہویں دوبارہ

بمب دھماکیاں، لاشاں تے اگّاں دے درِش

نہیں دھرنا چاہوندا میں

تیرے موڈھیاں تے

آدمی تے آدمی درمیان

اُساری گئی کٹّڑتا دی کَندھ

نہ ہی میں چاہوندا ہاں

کہ توں چُکّی پھِریں

بیت چُکّیاں قدراں قیمتاں دی

کھوکھلی سرونی وہِنگی …

 

جے توں وی

ایہناں سبھ احساس وِہونے

بیت چُکّے بِمباں وِرودھ

ڈٹ کے تن ہی گئی ہیں

تاں میرا اِک کوسا جیہا چُمّن

آپنیاں اکّھاں تے قبول کر

ایہناں تپدے سمیاں دی

تتّی تپدی ریتا تے کھڑکے

پڑھ محبت دِیاں آئتاں

کہ میں تینوں

سالم ثبوتی نوں تکّنا چاہوندا ہاں

کہ میں

ایہناں اَگنی باناں  ،چ

وِنھی ہوئی نوں تینوں

چُمّ چُمّ باؤری کرنا چاہوندا ہاں

کہ جِتّھے توں

تازے پھُلاّں نال لدّی

احساس یُکت بُلّھاں دی

حرکت تے تُردی ہوویں

 

 

 

٣٧

 

اودوں تاں

تُوں تَیر ہی آئی سی

چنہاں پیار دی اَتے ستّے سمُندر

اودوں تاں

تیری چاہت تے حسرت

پُوری کائنات دے سچ توں وڈّی سی

تے توں

اودوں مکمل عورت سَیں

پر میں اودوں

نہ تیری روح دے ہان دا سی

تے نہ ہی جِسم دے

اودوں تاں

تُوں دھرت سی پُوری دی پُوری

وِچھی پئی

پیار کھِلاردی

اودوں میں ادھورا ساں

ادّھا ادُھورا مرد

 

اوس پل لئی

مُعاف کر دیویں توں مینوں …

 

٣٨

 

تیرے جِسم دے پنّیاں تے

کِتے وی نہیں ہے کوئی واد

پر جد وی میں کِتے

تیرے پیار  ،چ رتّی

تیرے جِسم دِیاں پتّیاں دی خوشبو ونڈدی

کوئی کوتا پڑھدا ہاں

تاں اوہناں دِیاں اکّھاں  ،چ

محبت دِیاں آئتاں توں پہلاں

کوئی نہ کوئی لہر

کوئی نہ کوئی واد آ کھڑھا ہُندا ہے

 

جد کہ

تیرا جِسم

تے میرے احساس

اوہناں سبھ

وعدیاں دِیاں ولگناں لنگھ کے مِلے سن …

 

 

 

 

٣٩

 

سماج

گھر پریوار

ویاہ ساڈی عظیم سنستھا!!

تیلا تیلا اجے جُڑیا نہیں

تِنکا تِنکا کِرن وی لگّیا…

 

میاں   بیوی

شام سویرے جدوں وی مِلدے

جدوں وی وِچھڑدے

اِکّو ہی گل وار وار دُہراؤندے

میں تیرا… توں میرا…

توں میری… میں تیری…

کیہ ہے ایہہ سبھ؟

اینا اوپراپن

اینی بے وِساہی!!

 

اسیں

سبھیک ہاںسماجی جیو

کِرنوں کھُرنوں ڈردے تھملے

تے پُل

بندنا  ،چ لین ہے

آپنے

تھِرکدے تے پھڑکدے بُلّھاں سمیت…

 

 

 

٤٠

 

اِک اُچّا پہاڑ

تے وجّدی بِین تے کیلی

توں

میلدی

اوس پل دی وحشت

توں کُجھ لبھّناں چاہیں

کُجھ کڈّھنا چاہیں

میں سبھ کُجّھ دیکھاں

تے کھُبھّناں چاہاں

اسیں لبھّدے کیہ ہاں!

اسیں کڈّھدے کیہ ہاں!

 

 

 

٤١

 

تیریاں اکّھاں  ،چ وسی اُڈیک

تے اوہ سُپنے شَہزادے دے

تیرا

اپلک تکّنا راہواں نوں

سُپنا تکّنا

سترنگے اسمان وِچ اُڈاریاں بھرن دا…

 

کِتّھے ہاں میں؟

جو صِرف جِسم دے جُغرافیے  ،چ قید ہاں

نہیں حق مینوں

کہ تینوں اہلّیا دی جون پا جاواں

کوئی پھِر آوے جاں نہ

کیہ پتہ ہوندے وقت دے گیڑ دا…

…     …     …     …

نہیں…

تُوں میریاں ڈریاں کندھاں توں

کمبدے دروازیاں توں

کمزور کِھڑکیاں توں

میری سمرتھّا ہی ایڈی نہیں

کہ تیرے لئی

کُجھ وی چنگا، خوشگوار سِرج سکدا

 

نہ چھوہ مینوں

کھنڈر ہاں…

اَجّ ہاں   بھلک ہاں   کہ نہیں ہاں…

 

 

 

٤٢

 

انّ

پانی

ماس

گندھ

جِسم

سُگندھ

سبھ میری بُھکّھ پیاس نیں

جِسم توں تُردا

دِماغ دِیاں ناڑاں دا گرم لہو

اِک تھاں تے کیندرِت ہون لئی

تڑپدا ہے

ویگ ودھدا ہے

پُورا سریر

کُھوہ پُٹّدا ہے

اِک جِسم وِچّیں

پار لنگھن لئی

تیہ ہور ودّھ جاندی ہے

اِک پل لئی

آنند  ،چ لنگھدا ہے

تے پھِر

بُھکّھ لگدی ہے

شبد

دُھنیاں

کناں انوناں  ،چ پھَیلدی ہے

بُھکّھ ہور ودھدی ہے

 

 

 

٤٣

 

تُوں دھرتی

تے میں ورہدے میِنہہ دِیاں کنیاں

انگ انگ نوں تیرے

چُمّ چُمّ جاواں

جِتّھے جِتّھے

بِکھرے چُمّن میرے

پَے گئے

لالی ہریالی دے چٹاک

روم روم تیرے انگ دا

نشیائی جاوے

نِکھردا تے چہکدا

 

 

 

٤٤

 

توں جیوں پتّھر کوئی

نال سَینتاں کول بُلاویں

میں بُت گھاڑا

چھَینی رکھّاں انگ انگ تے

نال ہتھوڑی

ٹھاہ ٹھکّ  ٹھاہ ٹھکّ

انگ انگ توں چھِلدا جاوے

جیوں جیوں تینوں توڑاں چھِلاّں

دیہہ تیری اُبھّردی آوے

وِچوں توں ہی باہر آویں

ہر وار ہتھوڑی چھَینی

ٹھاہ ٹھکّ  ٹھاہ ٹھکّ

انگ انگ جو ڈھکّیا پہلاں

نِکھّر نِکھّر باہر آوے

میری پیاس نوں ہور مچاوے

 

 

 

٤٥

 

جد وی ویکھو

بُلاؤندی اِشارے نال

تانگھدی اُنگلاں دی چھوہ نوں

پوٹیاں نال کھُلّدی ہے

کمبدی

لرزدی

اندر جگاؤندی

چِراغ محبت دے

اُتھل پُتھل مچاؤندی ہے دِماغ  ،چ

نفرت

اگّ

سیت بارِش

جھرنے دے وہِن وانگ

پُرے دی وا جیہی

سُگندھ سُگندھ کر جاندی ہے

 

اکّھر اوہدے

اکّھاں اگّے نچّدے گُھمدے

بدل بدل کے شکلاں

جیوں اُڈّدے اسمانیں بدّل

چیتنا  ،چ مگھھدے

لِشکدے

تُہاڈِیاں کئی دِشاواں

تے راہ

بدل دیندی ہے کتاب

کتاب

رَیک  ،چوں ہتّھاں وِچیں ہوندی

آپنے شبداں نال

گھراں

محلاں

کھنڈراں تھیہاں

تناں مناں دے وِچیں لنگھدی

اسمانی برہِمنڈیں گُھمدی

خُود جا بیٹھدی ہے

واپس رَیک وِچ

تے

اِک ترتھلّی مچاؤندی

اِک اچّویں جیہی لاوندی

تُہاڈے دُھر اندر

کِتے وس جاندی ہے

 

کتاب

 

 

 

٤٦

 

پتّے گھاہ

پُھل

ڈوڈیاں

سبھ تے پَے رہی ہے بارِش

بھِجّ رہیا ہے

تن من

بارِش بھری پون

ساہاں  ،چ بھر رہی ہے یاداں

تن

باہروں بھِجّدا ہے

تے اندر مچا رہی ہے بارِش

ہتھ

ٹھنڈی پون  ،چ کمبدے لرزدے

تیرے جِسم تکّ پہُنچدے

گرما جاندے نے سبھ کُجھ

اِکّے سپرش راہیں

گھاہ

پتّے

پُھلّ ڈوڈیاں

سبھ وِچ

نویں جان

تازے ساہاں دا سنچار

کر رہی ہے بارِش

 

 

 

٤٧

 

اِک شبد

‘محبوب’

جو اِک سواد

دین ایمان

سارا جہان ہوندا سی کَدے

 

اِک شبد

محبوب

جو اِک یاد ہے

مگھدی تپدی

تے پل پل مٹھّی ہوندی اگّ

مچّدا سِوا

جیوں ہو جاندا ہے شانت

بن جاندا ہے راکھ

پھِر راکھ  ،چوں اُگّدا

نوَاں

کُجھ ہریاول ورگا

کوئی راگ ملہار

 

شبد محبوب

جو سادھن ہے

سواد راکھ تے راگ ملہار وِچکار

کِتے مہکدا

کِتے سہِکدا

 

 

 

٤٨

 

تینوں دیکھدیاں

چھوہدیاں تیری بھُر بھری پُوری ہستی نوں

میریاں پوٹیاں وِچّیں گُزر جاندا ہے

بِجلی وانگ

تیرے سُڈول

نویں نکور

تے مان متّے جِسم دا جلوہ

اکّھاں اگّے گُھم جاندے نیں

چہرے ہتھ

لگن نال منوں چِتّوں تینوں اُساردے

اوہ

چہرے تے ہتھ

جِنہاں تینوں کھنڈر نہیں سی دیکھنا

سگوں

دیکھنیاں سی توں

اوہناں دِیاں استیاں

وقت دِیاں ہنیریاں

دِلاں  ،چ مٹھّی پیندی مُحبّتی اگّ

جلن

روہ

کروپی

تیرے آدھار وِچ رلے وِسپھوٹک بیج

تے تُوں

اِک مٹھّ توں

اِک ستوپ توں

عبادتی احساساں دے موہ توں

بن جاندا ہیں کھنڈر

پِلّیاں پَیندیاں

سبّھیتاواں دِیاں لیہاں

دھرماں جنگاں دی سوڑی اکّھ

جو برداشت نہیں کردی

تیری ہستی تیرا جلو

تے بدل دیندا ہے تینوں

جو توں ہُن ہیں

…    …    …

تیرے نال چلدیاں

بِہبل لہراں وانگ

توں اُتردا ہیں میرے وجود وِچ

آپنیاں پنجاہ صدیاں دی

انگڑائی سمیت

اوہ سبھ صدیاں

جو جوانی توں بُڈھاپے

بُڈھاپے توں موت

تے پھِر ہڈّیاں دے کھُرن تیک سن

میں تیری

جوانی دا سیک محسوس رہیا ہاں

اے

منُکّھتا دے اتہاس دے

ساکھشی کھنڈر

توں کھنڈر نہیں

ان کہی کتھا ہیں

ان کِہیا اتہاس

جو آؤن والا وقت تَیتھوں سُنے گا

 

 

 

٤٩

 

پیاس محبت دی

سہِجے ہی چُن لیندی ہے

سنبھوگ جیہے چھِناں ول ودھدی

برہِمنڈ  ،چ بِخرے

سنبودھناں  ،چوں کوئی اِک نام

دِل

توں

ربّ

اﷲ

واہیگورو رام

سِمرن وانگ

دھیمے دھیمے تُردی تُردی

پانی اگن اُلنگھدی

انّے ویگ نال ودھدی

پھڑدی ہے

اوس پل نوں

جِتّھے وسدا اَنہد

دِل

توں

ربّ اﷲ واہیگورو رام

سِمرن وانگ

 

 

 

٥٠

 

زِندگی دِیاں

سبھ نعمتاں توں وڈّا ہے

تیریاں بھاوناواں دے

سمُندر دا تل رادھا!

محبت دے موتیاں نال بھریا

تیری آمد تے

ستّے خیراں

 

 

 

٥١

 

اُداس

تُوں نہیں ہوندی

اے سارنگی

ایہہ تاں

میرے من دا گز

تیرے گل لگ کے روندا ہے

 

اُداس توں نہیں ہوندی

 

 

 

 

٥٢

 

میں نچدا ہاں

پانی اگن ہوا

میرے سُر تال نے

تیرے جِسم دا جلوہ

بھڑکاؤندا ہے میرے من دی اگن

اگن

جو مچّدی ہے میری تلی تے

میں

تیرے موہ دے ناگاں دا ولیا

تینوں لبھّن لئی پیندا ہاں ہلاہل

میں نچّدا ہاں

اتھکّ

مِدّھدا ہاں بار بار آپے نوں

پَیر کَدے دبّ لیندے

تے کَدے کردے نے مُکت

تن  ،چوں وگدے

گرم لاوے دے سیک  ،چ مچّدی کایا نوں

توں میرے ساہاں دی دھونی

مگھھدی ہیں مچّدی ہیں

میرے اندر باہر چار دوار

میرے ساہاں انگاں  ،چ

سُگندھاں وانگ رچی اُما

آ

میری گتی  ،چ گتی بن کے رل جا

میرے ڈمرو دِیاں تنیاں وانگ

مینوں لگاتار مِل

کہ میں ہُن رُک نہیں سکدا

ایہہ تانڈو ہونی ہے میری

کہ میں جو سِرجنا ہے

تیرے نال سِرجاں گا

تَیتھوں بِناں

میں کُجھ نہیں

میں نچّدا ہاں تیرے لئی

 

 

 

٥٣

 

تینوں مِلدیاں ہی

مُکت ہوندا ہاں

میں سبھ جونیاں توں

تیرے وِچ سِمٹ جاندا ہے

میرا کُلّ سنسار

تے میں پاؤندا ہاں

آپنی اِچّھا دا سروپ

کہ توں

میری شکتی

مُکتی داتی

میری تریپتی دا سمُندر

 

 

 

 

٥٤

 

میں جد وی مِلدا ہاں تینوں

آخری وار مِلدا ہاں

پرم آنندی سِکھر تے

موت وانگ

پرت آؤندا ہاں

وِسمِت   آچنبھِت

کِسے بال وانگ

پھِر تیرے کول آؤن لئی

آخری وار

موت وانگ

 

 

 

٥٥

(ہری پرساد چورسّیا لئی)

 

(اِک)

 

تیرے بُلّھاں توں لَے کے

تیری محبت دے ساہاں دی سرگوشی

دریاواں دے پانیاں  ،چ

پہاڑاں کھیتاں جھرنیاں  ،چ

کنجک وانگ

اٹھکھیلیاں کردی ہے

رادھا جہی تیری بنسری

 

کلولاں کردی

پنچھیاں وانگ چہِکدی

میرے اندرلے باغاں  ،چ

اِندریاں دے مُنہ چوغا پاؤندی

ہریاول فَیلاؤندی ہے

تیری بنسری

 

 

 

(دو)

 

بِرہا  ،چ تڑپدی

سِسکدی ہولی ہولی

ویدن سنویدن دے شیشیاں توں پار

آپنی تنہائی دا

میرے اندر

ریگِستان وِچھاؤندی ہے

تیری بنسری

 

میری بھٹکن دے جنگل  ،چ

دُور کِتے گونجدی ہے

بِہبل مِلن لئی

اُداس ہیکاں نال

میرے ریگِستانی جنگلاں  ،چ

مِلن دا بھرم جل سِرجدی ہے

تیری بنسری

 

 

(تِن)

 

بنسری

ہور اُداس ہو گئی ہے

میرے اندر دی سندھیا

سُرخ لالی نوں آکھ رہی ہے… وداع

پھَیل رِہا ہے ہنیرا

میرے کول ہی کِتے

جاں بہُت دُور

بیٹھی ہے چُپّ چاپ

میرے اندر باہر

چار دوار

تیری بنسری

 

 

(چار)

 

میری کایا وِچیں لنگھدی

مایہ سِرجدی

کھنڈاں برہِمنڈاں وِچ

دھُکھدی… سِسکدی… مگھّھدی…

جگدی… لٹ لٹ بلدی

پھَیلاؤندی آپنا دُھنی سنسار

ناواں تھاواں تے سمیں توں پار

انیکاں رہسّ کھولھدی

انیکاں ہور سِرجدی

میریاں رگاں وِچ دؤڑدی ہے

لہو وانگ

ہوا وانگ

احساساں وانگ

تیرے بُلّھاں توں شکتی لیندی

میری محبوب

تیری بنسری

 

 

 

 

 

 

 

دیہی ناد : آدِکا

 

سورنجیت سوی دی ایہہ پُستک  ،دیہی ناد ، اِس گلّ دا پرمان ہے کہ پنجابی کویتا آدھونِک کال دی یتھارتھوادی وِچاردھارک پرمپرا نوں پار کردی ہوئی اُتّر آدھونِک پَیراڈائیم وِچ پرویش کر رہی ہے۔

اِس گلّ دے زوردار کھنڈن توں بعد کہ کویتا اوہ پاردرشی مادھیم ہے جس راہیں پاٹھک باہرمُکھی یتھارتھ دے ستھول رُوپ وِچ درشن کردے ہَن، ایہہ پُستک کویتا نوں اِکہرے ارتھاں، اِکو اِک سُچّی ویاکھیا اَتے نِرپیکھ ادھیئین دی جکڑ توں مُکت کرواؤندی ہے۔ ایہناں کویتاواں وِچ پیش ہون والے چِہنیکرن دا انِشچِت، استھِر اَتے استھائی سُبھا اِس پُستک دی پرمُکّھ وَڈیائی بن گیا ہے۔ ایہہ سارِیاں کویتاواں  ،میں ، (مرد) اَتے  ،توں ، (عورت) دے اَن٘تر سبندھت رِشتیاں دے نَیٹورک وِچوں وِگس رہے سبھیاچارک ڈِسکورس دا  ،میں ، (مرد کوی) دوارا پیش کیتا گیا بِرتانت ہے۔ پر ایہہ  ،میں ، (مرد) اَتے  ،توں ، (عورت) اینے انِشچِت، استھِر اَتے استھائی ہَن کہ کوی لِکھدا ہے:

توں جو وی ہیں

دیہہ، آکار، نِراکار

آدمی، عمارة، کھِڈونا، خُدا

خاک، کھنڈر، دھرت، اسمان

شبد، دُھنی، لیک

توں جو وی ہیں

پنچھی، سورج، لالی

سویر شام

خوشی اُداسی

اُڈان چُبھّی

توں جو وی ہیں

حرکت، ہنیر، روشن

سوخم ستھول

جو وی ہیں

میریاں اکّھاں راہیں

اُتّردا

میرے دِماغ دا سِرجیا

عکس ہے ماتر

تے میں جو وی ہاں

تیرے وِچوں بنیا اُنیاں اُگمیا

عکس ہاں تیرا

کوی تِنّ گلاّں سپشّٹ کردا ہے۔ پہلی گلّ تاں ایہہ کہ کِسے وی چِہن اندر چِہنک اَتے چِہنت دا نہ تاں کوئی سدیوی، ستھائی اَتے نِشچِت رشتہ ہُندا ہے اَتے نہ ہی کِسے اِک چِہن نوں کِسے اِکو اِک چِہنت نال سدا  لئی ستھائی طور تے جوڑیا جا سکدا ہے۔ اُداہرن دے طور  ،تے دُوسری کویتا  ،میں تیرے کول آؤندا ہاں ، وِچ توں (عورت) اِک سیمت دیہی وی ہے اَتے اسیم کامنا وی۔ اِسے طرح  ،میں ، (مرد) کِسے کویتا وِچ دیہی ہے، کِسے کویتا وِچ دیہی رہت گیان اَتے کِسے وِچ انن٘ت سپیس۔ پر ایہہ  ،میں ، اَتے  ،توں ، آپنی وِشِشٹ اَتے وِلکھّن ہستی کیول اِک دُوسرے نال رِشتے وِچوں ہی پراپت کردے ہَن :

اُداس توں نہیں ہُندی

اے سارنگی

ایہہ تاں

میرے من دا گز

تیرے گل لگ کے روندا ہے

اِس دِشا وِچ  ،میں ، (مرد) اَتے  ،توں ، (عورت) وِچکار دیہی اَتے کامنا دی ایکسچینج دا رشتہ وی اتی مہتّوپورن ہے۔ ایہہ رشتہ ہی بار بار مرد اَتے عورت دی وِلکھّن اَتے اڈّری پہچان دا آدھار بندا ہے۔ اِسے وِچوں ہی اُوہناں دے وِیکتیتَو اُسردے دِکھائی دِندے ہَن :

توں ہیں

کہ پیار لئی

ارپ دِندی ہے سریر

میں ہاں

جِسم لئی

سواد لئی

دیندا ہاں پیار…

جاں پھیر اِسے طرح اِک ہور کویتا وِچ کوی لِکھدا ہے :

توں خوش سَیں،

سُپنیاں دے چِراغ رگڑکے

میں خوش ساں

جِسم دے راگ  ،چ گُوآچکے

تھوڑھے جہے فرق نال

اسیں اِکو جہے ہی بھوگی ساں…

اِس طرح کوی، دُوسری گلّ ایہہ سپشّٹ کردا ہے کہ کِسے وی چِہن دی ہستی آپنے آپ وِچ نہیں، سگوں اُوہناں رِشتیاں وِچ ہُندی ہے، جہڑے رِشتے اوہ چِہن سبھیاچار جاں کاو نِرمان دے سفر دوران دُوسرے چِہناں نال بناؤندا ہے :

تیرا ہونا ہی

بھردا ہے

تیرے میرے اندرلے خلائ نوں

کہ جس وِچ

ساڈی رِشتگی دے انو سنچار کردے نے

میں کُجھ نہیں تیرے بِناں

توں کی ہیں، دسّ میرے بِنا

تیسری گلّ ایہہ کہ بھاویں سارِیاں کویتاواں وِچ کیول  ،میں ، (مرد) ہی بولدا ہے، توں (عورت) دا کِدھرے کوئی وی سن٘واد نہیں مِلدا، پر پھیر وی کاو  میں (مرد) ایہناں کویتاواں وِچ کاو توں (عورت) دے بولاں نوں، بِناں اُوسنوں کوئی بول دِتّے ہی کِسے حدّ تک ابِھوِیکت کر پاؤن وِچ سپھل رہندا ہے۔ ایہہ اِس لئی سنبھو ہو سکیا کیونکہ کوی وکھو وکھریاں کویتاواں وِچ وکھو وکھریاں پُزیشنز لیندا ہے۔ کِتے اوہ آپنے اندرلی گتی اَتے سِرجنا لئی لوہ کناں دی طرح چُمبک (کامنا، عورت) دی اُڈیک کردا ہے، کِتے اُوس (عورت) دے جِسم دی شبد رچنا کردا ہے، کِتے اُوسنوں کتاب سمجھ کے پڑھن دی کوشِس کردا ہے، کِتے اُوسدی دیہی (بنسری) دا سنگیت سُندا ہے… آد، آد۔ اِس طرح اوہ وکھو وکھریاں پُزیشنز لَے کے جِتھے  ،توں ، دِیاں ڈونگھائیاں وِچ اُتردا ہے اوتھے اُوس نال وکھو وکھرے رِشتے سِرج کے اوسدیاں اسیم سمبھاوناواں نوں وی اُجاگر کرن دی کوشش کردا ہے۔

سونرجیت سوی دی کویتا وِچ، اِس لئی اِک اِک چِہنک دے کئی کئی چِہنت ہی نہیں مِلدے، سگوں اوہ چِہنت، چِہنک بن کے، وکھو وکھریاں ستھِتیاں وِچ، وکھو وکھرے رِشتیاں راہیں انیکاں نویں چِہنت پیدا کر دِندے ہَن۔ اِس طرح ایہناں کویتاواں دے چِہنک وکھو وکھریاں ستھِتیاں مطابق چھلیڈے وانگ رُوپ بدلدے رہندے ہَن :

اکّھر اوہدے

اکّھاں اگّے نچّدے گُھمدے

بدل بدل کے شکلاں

جیوں اُڈّدے اسمانیں بدّل

چیتنا  ،چ مگھھدے

لِشکدے

تُہاڈِیاں کئی دِشاواں

تے راہ

بدل دِندی ہے کتاب

نتیجے وجوں سورنجیت سوی دِیاں ایہناں کویتاواں وِچ اِک دُوسرے نوں کاٹ کردیاں ارتھاں دِیاں انیکاں ترنگاں اِکو ویلے چلدیاں رہندیاں ہَن جس کرکے پاٹھک ایہناں کویتاواں دے ارتھ پراپت نہیں کردا، سگوں آپنے تجربے، پرستھِتیاں، پُزیشنز اَتے آشا مطابق ارتھاں دا اُتپادن کردا ہے۔ ایہناں کویتاواں اُپر ارتھاں دی سَینسرشِپ لاگوُ نہیں ہے۔ جدوں کوئی آلوچک ایہناں کویتاواں نوں پڑھکے ایہناں دی ویاکھیا کردا ہے، تاں اوہ ویاکھیا کِسے وی حالت وِچ باہرمُکھی اَتے انتم نہیں ہو سکدی۔ اِس آلوچناتمک ویاکھیا دی وی آلوچناتمک ویاکھیا ہو سکدی ہے۔ اِس ویاکھیا در ویاکھیا دا کوئی انت نہیں۔ اِس کرکے سرَو پروانِت، باہرمُکھی اِکو اِک اَتے وِگیانک ویاکھیا دے داعویدار مٹھّے پَے جاندے ہَن۔ ایہہ کویتاواں اِک اُداسین اُپبھوگی پاٹھک نوں سیمت ارتھاں، معیاری پاٹھاں اَتے وِچاردھارک تنگدِلیاں دی قید توں مُکت کروَا کے ٹَیکسٹ دے نِرمان وِچ لیکھک دے برابر دا بھائیوال بنا دِندیاں ہَن۔

سورنجیت سوی جاندا ہے کہ کیویں کوئی کویتا پاٹھک اُپر نِشچِت عرباں، سیمت پاٹھ وِدھیاں اَتے وِچاردھارک تنگ دِلیاں دا بوجھ لدّ دِندی ہے :

تیرے جِسم دے پنّیاں تے

کِتے وی نہیں ہے کوئی واد

پر جد وی میں کِتے

تیرے پیار  ،چ رتّی

تیرے جِسم دِیاں پتّیاں دی خوشبو ونڈدی

کوئی کویتا پڑھدا ہاں

تاں اوناں دِیاں اکّھاں  ،چ

محبت دِیاں آئتاں توں پہلاں

کوئی نہ کوئی لہر

کوئی نہ کوئی واد آ کھڑھا ہُندا ہے

جد کہ

تیرا جِسم

تے میرے احساس

اوناں سبھ

واداں دِیاں ولگناں لنگھ کے مِلے سن…

پر اوہ ایہہ وی سمجھدا ہے کہ ارتھاں اَتے وِچاردھارا دِیاں ولگناں نوں ٹپّ کے مُڑ سہج اَتے پراکِرتک نہیں ہویا جا سکدا۔ منُکھی من اِس وِراٹ نگن ساغر نوں ارتھاں اَتے وِچاردھارک درِشٹیکوناں دے کجّناں وستراں وِچ ڈھک دیندا ہے۔ ایہہ کجّن اَتے وستر بھاشا دے بنے ہُندے ہَن۔ بھاشا اِک سماجک ورتارا ہے۔ اِس طرح کوئی وی سموہک من کِسے وی سہج اَتے پراکِرتک ورتارے نوں آپنی بھاشک یوگتا راہیں سبھیاچارک پربندھ وِچ تبدیل کر دِندی ہے۔

جیوں جیوں

کجّناں وستراں

تے پردیاں دی چھاں

تیرے جِسم تے ہُندی گئی

میں

قُدرت توں

اِک سہج آکرشن توں

وِراٹ نگن ساغر توں

محروم ہُندا گیا

سِمٹدا گیا

تے میں سہج نہ رِہا

توں پراکِرتک نہ رہی

بھاشک یوگتا راہیں سہج پراکرِتک ورتارے دے سبھیاچارک پربندھ وِچ روپانترن دی وِدھی نوں سورنجیت سوی بہُت خوبصورت ڈھنگ نال بیان کردا ہے۔ اوہ کہندا ہے کہ سبھ توں پہلاں مرد اَتے عورتاں سن۔ ایہناں وِچ کیول اِک ہی رشتہ سی ہان پروان دا رشتہ سارے جیو جنتواں نال سانجھا کام دا رشتہ۔ پر جدوں بھاشک یوگتا (شبد) آئی تاں اُوس نے اِسے مرد نوں پِیو، پتی، بھرا، پُتّر، عاشق آد وِچ اَتے عورت نوں ماں، پتنی، بھین، بیٹی، معشوق آد وِچ وِکھنڈِت کر دِتّا۔ اِسدے پھلسروپ رِشتیاں دا اِک نَیٹورک اُسرنا شروع ہو گیا جِسنے سبھیاچار نوں جنم دِتّا :

توں تے میں

جِسم ساں

میں مرد توں عورت

تیری ضرورت

ساڈی اِچّھا  سبھ ہان پروان

اسیں مِلدے

جُڑدے بھوگدے ماندے…

تیری میری بھاشا

ساڈے جِسماں دی زُبان

پھِر شبد آیا

بھاشا دے اُبال دی آواز

توں تربھکی

میں ڈولیا

اِک گونج سی

تے اسیں

توں تے میں توں

مرد تے عورت توں

ماں پیو پتنی بھین بھرا…

تے ہور کِنّے ہی سنبودھناں وِچ اُلجھ گئے…

اسیں

سبھیک ہو گئے!

سماجک ہو گئے!

سماج

جو سیما ہے

ترتیب ہے

ایہہ سموہک من ہی ہے جو بھاشا راہیں اِس سہج اَتے نِرنتر پراکرِتی نوں وِلکھّن اَتے اڈّری پہچان رکّھن والیاں سبھیاچارک وستُواں اَتے پرکرِآواں وِچ روپانترِت کر دیندا ہے۔ ایہہ بھاشا آپنی واک رچنا راہیں سموہک من نوں اِک وِچاردھارک سنگٹھن دِندی ہے۔ واک رچنا دا ایہہ ترک ہی پھیر ہر انُوبھَو نوں آپنے سبھیاچارک انوشاسن وِچ بنّھ دیندا ہے۔ اِسے لئی، کویتا وی، اِس سماجک سیما اَتے سبھیاچارک ترک دی جکڑ کارن، اِکہرے ارتھاں اَتے وِچاردھارک انوشاسن دی دھارنی بن جاندی ہے۔ پر ایہہ بھاشا دوارا سِرجیا جان والا ترک ہی تاں سبھ کُجھ نہیں ہُندا۔ کامنا (ڈیزائر) اِس سبھیاچارک انوشاسن نوں بھنگ کرکے اَتے اِس بھاشائی ترک دی چودھر نوں توڑکے سبھیاچارک تبدیلی دے راہ موکلے کردی ہے :

سپرش تیرا

میرے تن تے

کِتے وی

بِہبل کر دیندا ہے

سمُندر اندر وگدیاں ندیاں نوں

ساہاں دی گتی نوں

پنچھیاں دی پرواز نوں

پوناں دی آواز نوں

اِس کویتا وِچ  ،تیرا سپرش ، اوہ جنونّ جاں کامنا ہے جو منُکّھی من، منُکّھی بھاشا جاں منُکّھی سبھیاچار دے انوشاسن اندر ہل چل مچا دِندی ہے۔ منُکّھی من اندر وگدیاں ندیاں، منُکّھی سبھیاچار دی پرواز، آد سبھ کاسے نوں بِہبل کر دِندی ہے۔

سورنجیت سوی سبھیاچارک ٹھہرا نوں جاں منُکّھی من دے تارکِک انوشاسن نوں اُوس رُکمنی دے رُوپ وِچ انُوبھَو کردا ہے جو ساغر وانگ ٹھہری ہوئی اَتے تپ دے گیان اَتے یوگ دی شکتی راہیں انوشاسن وِچ بجھّی ہوئی ہے۔ سبھیاچارک ٹھہرا، ترک اَتے انوشاسن دی گھر گرہِستھی وِچ رادھا آپنے جنونّ اَتے عِشق راہیں اسیم کامنا (ڈیزائر) دی پرتیک بن کے اِک نویں سویر دے سوہے رنگ نال داخل ہُندی ہے۔ پر منُکھی من اِس نویں سویر دے راگاں نال ویہ نہیں تُردا۔ ایہہ نویں سویر دا سوہا راگ تاں بس بِہبل ہی کردا ہے:

نِکلدیاں نے اوتھوں

لِشکدیاں تپدیاں وہِندیاں

ویگ متّیاں دھُناں

فَیل جاندیاں نے ساڈی کائنات وِچ

سبھیاچارک ٹھہرا، وِچاردھارک انوشاسن، بھاشائی ترک آد سبھ اگّے پرشن چِنّھ لگ جاندا ہے۔ سبھیاچارک چِنّھ آپنے سیمت اَتے نِشچِت ارتھاں نالوں ٹُٹّ کے اسیم چِہنکاں نال جُڑ جاندے ہَن۔ چِہنک اَتے چِہنت دے رِشتے وِچ دُپھیڑ، انِشچِتتا اَتے استھِرتا آ جاندی ہے۔ رادھا رُکمنی اَتے میں دی تِکون وِچ میں دی بِہبلتا نوں کوی اِس طرح پیش کردا ہے :

رادھا

جنونّ عِشق

تیز وگدی ندی

سُچّی شوکدی سویر

دِل دی بنسری تے تھِرکدا سوہا راگ

پُھلّ تے پئی کُوآر تریل

 

رُکمنی

ساغر

تپ یوگ

تے میں

وِچکار بھٹکدا ویگ

ہنبھیا تھکّیا

اکّیا

اُداس شِلالیکھ

سبھیاچارک انوشاسن (رُکمنی) اَتے اسیم کامنا (رادھا) دا ٹکرائ منُکّھی من (میں) نوں کوئی دِشا پردان نہیں کردا، سگوں اُوس اندر نویں راہاں دی تلاش لئی اُداسی اَتے ویگ پیدا کر دیندا ہے۔ اسیم کامنا سبھیاچارک انوشاسن نوں بھنگ کرکے چِنّھ دی استھِرتا راہیں ہی ایہہ سمبھاونا پیدا کردی ہے۔ بھاشائی اَتے سبھیاچارک ترک توں مُکت کاو راہیں ہی ایہہ سمبھاونا پیدا کردی ہے۔ بھاشائی اَتے سبھیاچارک ترک توں مُکت کاو راہیں ابِھوِیکت ہون والی اسیم کامنا سبھیاچار دے حاکمانہ ڈِسکورس اندر استھِرتا پیدا کرکے سماجک تبدیلی دے نویں راہ کھولھدی ہے۔ ایہہ اسیم کامنا بہُت واری آپنی سوندرے شکتی راہیں وی آپنا کارج نِبھاؤندی ہے۔ ہری پرساد چورسّیا نوں سمرپِت کویتا  ،تیری بنسری ، اِس دی اِک خوبصورت اُداہرن ہے۔ اِس کویتا دے آخری (چوتھے) بھاگ وِچ سورنجیت سوی لِکھدا ہے :

میری کایا وِچیں لنگھدی

مایہ سِرجدی

کھنڈاں برہِمنڈاں وِچ

دھُکھدی… سِسکدی… مگھّھدی…

جگدی… لٹ لٹ بلدی

پھَیلاؤندی آپنا دُھنی سنسار

ناواں تھاواں تے سمیں توں پار

انیکاں ہور سِرجدی

میریاں رگاں وِچ دؤڑدی ہے

لہو وانگ

ہوا وانگ

اہِساساں وانگ

تیرے بُلّھاں توں شکتی لیندی

میری محبوب

تیری بنسری۔

ایہہ اسیم کامنا کیول سوندرے شکتی وِچ روپانترِت ہو کے ہی آپنا کارج نہیں نِبھاؤندی سگوں بے رنگ، نیرس اَتے ستھِر زندگی نوں سوہج نال بھر کے وی اِس اندر گتی شیلتا پیدا کر دِندی ہے۔ سبھیاچارک انوشاسن، سماجک ٹھہرا اَتے بھاشائی ترک کارن اِکہرے ارتھاں اَتے وِچاردھارک سیماواں وِچ بجھّی ہوئی پُرانی کویتا نوں اِس طرح دی گتی شیلتا راہیں نویں کویتا وِچ روپانترِت کر دینا ہی شاید سورنجیت سوی دی سبھ توں وڈّی پراپتی ہے۔

میں نچّدا ہاں

پانی اگن ہوا

میرے سُر تال نے

تیرے جِسم دا جلو

بھڑکاؤندا ہے میرے من دی اگن

اگن

جو مچّدی ہے میری تلی تے

میں

تیرے موہ دے ناگاں دا ولیا

تینوں لبھّن لئی پیندا ہاں ہلاہل

میں نچّدا ہاں

اتھکّ

مِدّھدا ہاں بار بار آپے نوں

پَیر کَدے دبّ لیندے نے

تے کَدے کردے نے مُکت

تن  ،چوں وگدے

گرم لاوے دے سیک  ،چ مچّدی کایا نوں

توں میرے ساہاں دی دھونی

مگھھدی ہیں مچّدی ہیں

میرے اندر باہر چار دوار

میرے ساہاں انگاں  ،چ

سُگندھاں وانگ رچی اُما

سورنجیت سوی لِکھدا ہے کہ انّ، پانی، ماس، گندھ، سُگندھ آد سبھ مانو دی بُھکّھ پیاس ہَن۔ جدوں منُکھ اِس بُھکّھ پیاس نوں ایہناں دی تریپتی لئی آپنیاں لوڑاں دے رُوپ وِچ بھاشا راہیں اِک ڈِسکورس وِچ ابِھوِیکت کرن دی کوشش کردا ہے تاں سبھیاچار ایہناں نوں سنتُشٹ کرن دی تھاں کام، کرودھ، لوبھ، موہ، ہنکار دے رُوپ وِچ کدی وی نہ پُوری ہون والی اسیم کامنا وِچ روپانترِت کر دیندا ہے۔ ایہہ اسیم کامنا چِہنکاں دی لڑی وِچ بِجلی دے کرنٹ وانگ وِچردی ہے۔ جدوں کوئی  ،میں ، آپنی کِسے کامنا نوں ابِھوِیکت کرن دی کوشش کردی ہے تاں اُوس  ،میں ، دا سبھیاچارک اَوچیتن اِس کامنا نوں مَیٹاپھورِک سبسٹیچِیوشنز اَتے مَیٹانِمِک ڈِسپلیسمَینٹس راہیں، اُوسدے چیتن سبھیاچارک انوشاسن توں ہٹ کے، اُوسدے سُپنیاں، کلا کرِتاں، کاو کرِتاں، ہاسے مذاق اَتے بھاوُک وہناں آد وِچ استھِر چِہنیکرن راہیں ابِھوِیکت کردا ہے۔ اُداہرن دے طور  ،تے کام بُھکّھ سارے جیواں وِچ مِلدی ہے۔ ایہہ جَیوِک پروِرتی ہے۔ پر منُکھ جدوں اِس کام بُھکّھ نوں اِسدی تریپتی لئی آپنی لوڑ دے رُوپ وِچ بھاشا راہیں ڈِسکورس وِچ ابھِویت کردا ہے، تاں ایہہ کام بُھکّھ (سَیکس) کام واسنا (سَیکسُئیلِٹی) وِچ روپانترِت ہو جاندی ہے۔ کام جَیوِکتا دا لچّھن ہے جدوں کہ کام واسنا منُکھی سبھیاچار (بھاشا) دی اُپج۔ کام بھُکھ تاں سنبھوگ راہیں پُوری ہو جاندی ہے، پر کام واسنا کدی وی نہ پُوری ہو سکن والی سبھیاچارک کرِتی ہے، جو ہمیشہ ودھدی ہی رہندی ہے۔ سبھیاچارک انوشاسن اِس اسیم کامُک واسنا نوں آپنی جکڑن کارن چیتن رُوپ وِچ ابِھوِیکت ہون توں روکدا ہے۔ پر اَوچیتن اِس کامُک واسنا دا ساہت اَتے کلا وِچ چِہنیکرن کردا رہندا ہے :

انّ

پانی

ماس

گندھ

جِسم

سُگندھ

سبھ میری بُھکّھ پیاس نے

جِسم توں تُردا

دِماغ دِیاں

ناڑاں دا گرم لہو

اِک تھاں تے کیندرِت ہون لئی

تڑپدا ہے

ویگ ودھدا ہے

پُورا سریر

کُھوہ پُٹّدا ہے

اِک جِسم وِ چّ

پار لنگھن لئی

تیہ ہور ودّھ جاندی ہے

بُھکّھ ہور ودھدی ہے

اِک پل لئی

اِک چھِن لئی

آنند  ،چ لنگھدا ہے

تے پھِر

بُھکّھ لگدی ہے

شبد

دھُنیاں

کناں انوناں  ،چ فَیلدی ہے

بُھکّھ ہور ودھدی ہے۔

پنجابی اَتے بھارتی سبھیاچار وِچ کامُک پیار نوں منُکّھ دے ادھیاتمک اَتے نَیتِک وِکاس دے راہ وِچ اِک بہُت وڈّی رُکاوٹ سمجھیا جاندا ہے۔ انیک کتھاواں مِلدیاں ہَن جِہناں وِچ خوبصورت اپسراواں آپنی کامُکتا نال دیوَتیاں دی سمادھی بھنگ کر دِندیاں ہَن۔ ایہہ سمجھیا جاندا ہے کہ عورتاں وِچ مرداں دے مُقابلے ودھیرے کام واسنا ہُندی ہے۔ مرداں اندر ایہہ وِشواس پیدا کرن دی کوشش کیتی جاندی ہے کہ ویرج ہی اُوہناں دی اصل شکتی ہے۔ اِس لئی مرداں نوں ویرج آپنے اندر ہی سانبھ سنبھال کے رکّھنا چاہیدا ہے۔ منُکھی سریر اندر اِسدی سنبھال نال مرد اندر ادھیاتمک، نَیتِک، مانسِک، سریرک آد ہر قِسم دی شکتی دا وِکاس ہُندا ہے۔ اِس لئی مرد نوں گھٹ توں گھٹ بھوگ وِلاس کرنا چاہیدا ہے۔ ہو سکے تاں ویرج نوں کیول سنتان اُتپدی لئی ہی ورتیا جاوے۔ وادھو کام کریڑا نال مرد دی ایہہ شکتی نشٹ ہُندی ہے۔ کام واسنا اُپر قابو پاؤنا ہر طرح نال ضروری سمجھیا جاندا ہے۔ آپنی اِکو اِک ویاہُتا پتنی توں علاوہ کِسے دُوسری عورت نوں کامُک نظر نال دیکھنا وی نَیتِک طور  ،تے گھٹِیا بنا دِتّا گیا۔

ویرج نوں سنبھال کے رکّھن، گھٹ توں گھٹ سنبھوگ کرن، دُوسریاں عورتاں نال کامُک رِشتے دی مناہی، شادی توں پہلاں کامُک پیار تے پُورن پابندی، ماہواری دے دِناں وِچ عورت نوں دُور رکّھنا، سنبھوگ توں پہلاں اَتے بعد دِیاں کامُک کِریاواں دی غَیر حاضری، سنبھوگ دوران عورت دی کامک تریپتی نوں نظر انداذ کرنا، عورتاں اُپّر آپنیاں کام لوڑاں نوں ابِھوِیکت کرن دی پابندی کام کریڑا وِچ ونّ سونّتا دی گھاٹ اَتے برہمچاری آد پروِرتیاں نے پنجابی اَتے بھارتی سبھیاچار وِچ مرد عورت دے اِس رِشتے دی خوبصورتی، اِسدے وِشال ارتھاں اَتے اسیم آنند توں محروم رکّھ کے اَتے سبھیاچارک وِکاس وِچ کامُک پیار دے مہتّو نوں گھٹا کے مانوَتا نوں بہُت ہی سوڑی اَتے کٹّڑ قِسم دی سماجک اَتے سبھیاچارک نِیَماولی وِچ جکڑ دِتّا گیا ہے۔

کامُکتا، کام واسنا، کامُک پیار، کامُک رِشتیاں، کامُک آنند، کامُک سوندرے، کامُک ارتھاں، کام کریڑا اَتے ایہناں دے منُکّھی سبھیاچار دے نِرمان وِچ یوگدان آد پرتی ساڈے رویئے وِچ اِک کرانتی کاری تبدیلی دی لوڑ محسوس کیتی جا رہی ہے۔ سورنجیت سوی نے اِس چُنوتی نوں سوِکار کیتا ہے۔ اُوس دِیاں ایہہ کویتاواں اجیہے رِشتیاں نوں سمجھن دی چیشٹا ہی نہیں کردیاں، سگوں کھجُراہو اَتے اُڑیسی مندراں، مہانیان، شَیو اَتے وَیشنو آد پرمپراواں وانگ کامُک آویش نوں ادھیاتمک انُوبھَو، سمادھی اَتے سنجوگ تکّ لَے جان دی کوشش وی کردیاں ہَن :

تینوں مِلدیاں ہی

مُکت ہُندا ہاں

میں سبھ جونیاں توں

تیرے وِچ سِمٹ جاندا ہے

میرا کُلّ سنسار

تے میں پاؤندا ہاں

آپنی اِچّھا دا سروپ

کہ توں

میری شکتی

مُکتی داتی

میری تریپتی دا سمُندر

ایہہ کویتاواں جِسماں دے سن٘واد وِچوں پیدا ہون والے احساس نوں وی محسوس کردیاں ہَن :

اِس پل

میں صِرف احساس ہاں

گڑُچّ جِسماں وِ چّ

گُزردے راگ ورگا

اُٹھّدی بھاف ورگا

آنند وِشاد ورگا…

اِس پل

میں

اُوس پل دا

احساس ہاں ماتر…

سورنجیت سوی کامُک رِشتیاں نوں ادھیاتمک سنجوگ دے رُوپ وِچ سِرج کے ایہناں نوں بودھِک چِنتن تکّ محدود نہیں کر دیندا۔ دیہی دے سمپورن دخل راہیں اوہ کارتیسین قِسم دی نِراندرِ چیتنتا نوں توڑ کے تن اَتے من نوں اِک رِشتگی وِچ بنّھ دیندا ہے :

جِویں پتّھر وِچ چُپّ ہُندی ہے

جِویں پُھلّ پتّیاں  ،چ

ہوا دی سرسراہٹ ہُندی ہے

جِویں سُر کیتی سارنگی  ،چوں لنگھدیاں

گاؤن لگّدی ہے ہوا

اوہ دیہہ ادھارت شکتی دے مہتّو نوں محسوس کردا ہے۔ واسنا، سوندرے، گیان اَتے شکتی نال بھرپُور تناں اَتے مناں نوں اِک سن٘واد، سنچار جاں رِشتگی راہیں اِک سفر تے لَے تُردا ہے :

تیری ہر تال تے

میری بنسری نچّے

تے مینوں بہُت کُجّھ دسّے

کہ توں ہی ہیں

میری اگیانتا دی سُرنگ اندر

لٹ لٹ بلدا

گیان دا دِیوا

تیرے وِچوں

تیرے اندروں

ہر یاترا کردا

میں لبھّدا ہاں تے لیندا ہاں

روشنی گیان شکتی

ہر وار

بہُت کُجھ رہ ہی جاندا ہے

پھِر میں آؤندا ہاں

وِچھاؤندا ہاں

آپنے پیار دی چادر

توں آ

میری چادر نوں آپنی مخملی چھوہ دیہہ

تے مینوں روشنی دے دیہہ

کہ میں بھریا نہیں اجے

رَتّی

اُما

رادھا!

میرے پیار دی ماتا

اِکو اِک پرماتما وِچ ابھید ہو رہی واسنا رہت، ہؤمَے رہت اَتے سوندرے رہت اِکاگر چِت پار سریرک منُکھی چیتنا وِچ اُوس دی کوئی دِلچسپی نہیں :

تے ساڈا چھڑینتر

جِسماں توں پار جان دا

جِسماں نوں ورت لین دا

تے پھِر

ایہناں دے احساس توں مُکت ہون دا…

سبھ سُچیت جیہا ہے

گھڑیا جیہا لگدا ہے

کِسے کمزور جہی غزل دے کرافٹ ورگا

اوہ تاں اجیہی مُکتی توں کِتے دُور من دِیاں چنچل سُراں تے تن دِیاں راگنیاں وِچ گُھمدے جگیاسو دا قائل ہے :

میں

منتر مُگدھ ہاں

تیرے من دِیاں راگنیاں وِچ

گُھمدا ہاں

تیری کایا تیری مایہ وِچیں

تیریاں ہرنوٹیاں ریجھاں دا ولیا

آپنے اندرلے لاوے دا ڈسیا

مُکت نہیں ہُندا

پل دے ہزارویں حِصّے  ،چ وی

نِربھؤ اَتے نِروَیر ستھِتی توں دُور کام، کرودھ، لوبھ، موہ دے انگ انگ وِراٹ رُوپ اختیار کر رہیاں ریجھاں والے اُوس دے جگیاسو مانو دی کوئی اِک وشیش، وِلکھّن کیندری اَتے بند اِکائی والی سنگٹھِت پہچان نہیں ہے۔ اُوسدا ایہہ مانو تاں بہُو پکھّی، بہُو پرتی، بہُو دِشاوی، پَیراڈوکسیکل اَتے مِشرِت ابِھوِیکتی ہے جِتھے انیکاں اَن٘تر سبندھت اَتے سمانانتر وِلکھّنتاواں دی سن٘واد مُکھی جنگ چلدی رہندی ہے۔ سبھیاچارک اَتے قومی ہستی دی وی اجیہی ہی تناؤ پُورن ستھِتی ہُندی ہے۔ دراصل اِس تناؤ وِچوں ہی وِیکتی، سبھیاچار اَتے قومی پہچان دے چِہن اُبھردے ہَن۔ تے سورنجیت سوی دِیاں ایہناں کویتاواں دا نِرمان وی اجیہی تناؤپورن ستھِتی وِچوں ہی ہو رِہا دِکھائی دیندا ہے۔

 

امرجیت گریوال

 

 

 

ਕੁਝ ਕਵਿਤਾਵਾਂ

ਜੁਲਾਈ 7, 2010

ਕੁਝ ਕਵਿਤਾਵਾਂ


ਮੰਤਰ

ਜਿਸਮ ਤੇ ਪੈਂਦੇ ਚਿਮਟਿਆਂ ਨਾਲ
ਲੂਸਿਆ ਗਿਆ
ਜਿਸਮ ਕੂਲਾ ਕੂਲਾ

ਵਿਲਕਦੀਆਂ ਅੱਖਾਂ ਦੇਖ
ਰੂਹ ਕੰਬ ਗਈ
ਤੇ ਉਹ ਬਾਬਾ
ਕਿਸੇ ਰੂਹ ਤੋਂ ਮੁਕਤ ਕਰਵਾਉਣ ਲਈ
ਬੇਰਹਿਮੀ ਨਾਲ ਮਾਰਦਾ
ਪਤਾ ਨਹੀਂ
ਕਿਹੜੇ ਮੰਤਰ ਪੜੀ ਜਾਂਦਾ  !!!


ਕੀ ਹੈ  ?

ਕਿੱਥੇ ਹਾਂ ਮੈਂ ?
ਤਾਂ ਬਹੁਤ ਕੁਝ ਇਕ ਦਮ ਦੂਰ ਜਾ ਖਲੋਂਤਾ ਹੈ
ਮਸਲਨ
ਤੂੰ , ਧਰਤੀ ,ਲੋਕ ,ਗ੍ਰਹਿ ,ਹ੍ਹਨੇਰ-ਚੁਪ
ਸਭ ਕੁਝ

ਕੀ ਹਾਂ ਮੈਂ?
ਇਕ ਦੂਰੀ ਤੇ ਹੋ ਜਾਂਦਾ ਹਾਂ ਮੈਂ
ਆਪਣੀ ਦੇਹ ਤੋਂ

ਇਹ ਮਨ ਕੀ ਹੈ ?
ਤਾਂ ਮੇਰੇ ਵਿਚੋਂ ਇਹ ਵੀ ਦੂਰ ਜਾ ਖਲੋਂਦਾ ਹੈ

ਚੇਤਨਾ ਕੀ ਹੈ
ਇਹ ਕੌਣਦੇਖ ਰਿਹਾ ਹੈ

ਕੀ ਇਹ ਮੈਂ ਹਾਂ?
ਤਾਂ ਇਕ ਪਾਰਦਰਸ਼ੀ ਜਿਹਾ ਕੁਝ
ਹਰ ਤਰਫ ਦੇਖ ਰਿਹਾ ਹੈ
ਹਵਾ , ਚੇਤਨਾ , ਸ਼ਬਦ ,ਕਾਲ ,ਮੈਂ
ਨਹੀਂ-
ਕੁਝ ਹੋਰ ਹੈ
ਜੋ ਮੇਰੇ ਵਿਚੋਂ ਦੇਖ ਰਿਹਾ ਹੈ-ਸਭ ਕੁਝ-ਮੇਰੇ ਰਾਹੀਂ
ਕੀ ਹੈ ???


ਤੂੰ

ਤੂੰ
ਨਾ ਗਿਆਨ
ਨਾ ਅਗਿਆਨ ਕਾਰਨ ਹੈਂ
ਤੂੰ ਤਾਂ ਬੱਸ
ਮੇਰੇ ਜਿਸਮ ਦੀ ਕਿਤਾਬ ਨੂੰ
ਘੁੱਣ ਵਾਂਗ ਚੱਟ ਰਹੀ ਹੈਂ ਹਰ ਪੱਲ
ਤੇ ਉਹ ਗਰਦ
ਜੋ ਧੀਮੇ ਧੀਮੇ ਕਿਰਦਾ ਹੈ ਮੇਰੇ ਚੋਂ
ਇਸ ਗਰਦ ਦੀ ਦਹਿਸ਼ਤ
ਕਿ ਮੈਂ ਹੁਣੇ ਹਾਂ
ਤੇ ਹੁਣੇ ਨਹੀਂ

…   …   …

ਮਾਂ……..

ਮਈ 15, 2009

ਮਾਂ……..

ਹੁਣ ਜਦ ਮਾਂ
ਹਰਦੁਆਰ ਵਾਲੀ ਵਹੀ ‘ਚ ਜਾ ਬੈਠੀ
ਸਹੁਰਿਆਂ ਦੇ ਪੁਸ਼ਤੀ ਖਾਤਿਆਂ ‘ਚ
ਤਾਂ ਪਿਤਾ ਧਾਹੀਂ ਰੋਂਦਾ ਹੈ

ਮਾਂ ਨਾਲ ਕੀਤੀਆਂ ਵਧੀਕੀਆਂ ਲਈ
ਬਾਰ ਬਾਰ ਮੁਆਫੀਆਂ ਮੰਗਦਾ ਹੈ
ਜਾਂ ਆਪਣੀ ਸਲਤਨਤ ਦੇ
   ਖੁੱਸ ਜਾਣ ਦਾ ਵਿਰਲਾਪ ਕਰਦਾ ਹੈ

ਮਾਂ ਧਰਤੀ-
        ਜਿੱਥੇ ਪਿਤਾ ਨੇ ਨਾ ਪਿਆਰ-ਨਾ ਸਾਥ
                     ਬੱਸ ਹੁਕਮ ਬੀਜਿਆ

ਮਾਂ ਜਿਸਨੇ-
        ਹਰ ਤੰਗੀ ਤੁਰਸ਼ੀ ‘ਚ
        ਪਿਤਾ ਦੇ ਮੋਢੇ ਨਾਲ ਮੋਢਾ ਲਾ
        ਘਰ ਦਾ ਤੀਲਾ ਤੀਲਾ ਜੋੜਿਆ
        ਖੂਹ ਜਿੰਨੇ ਡੂੰਘੇ ਪਲਾਟ ਵਿਚ
        ਹੱਥੀਂ ਟੋਕਰੀਆਂ ਨਾਲ ਭਰਤ ਪਾਇਆ
                        ਤੇ ਘਰ ਸਜਾਇਆ

ਮਾਂ- ਧਰਤੀ ਮਾਂ-
        ਜਿਸਨੇ ਕਦੇ ਸੀ ਨਾ ਕੀਤੀ
        ਨਾ ਬੱਚੇ ਜੰਮਣ ਵੇਲੇ
        ਨਾ ਪਾਲਣ ਵੇਲੇ
        ਬੱਸ ਹਰ ਵਕਤ ਕੁਝ ਨ ਕੁਝ ਕਰਦੀ ਰਹੀ
                              ਸੰਵਾਰਦੀ ਰਹੀ

ਮਾਂ ਨੇ ਦਿੳਰ ਨੂੰ ਵੀ ਮਾਂ ਵਾਂਗ ਪਾਲਿਆ
       ਤੇ ਜੇਠ ਦੇ ਘਰ ਕੁੱਖ ਖਾਲੀ ਦੇਖ ਕੇ
       ਆਪਣੇ ਦੋ ਬੱਚੇ ਉਹਦੀ ਝੋਲੀ ਪਾਏ
       ਸੁੰਨੇ ਵਿਹੜੇ ‘ਚ ਰੌਣਕਾਂ ਭਰੀਆਂ
ਮਾਂ –
       ਜਿਸਨੇ ਪਿਤਾ ਦੇ ਹਰ ਵਾਰ
       ਭੈਣਾਂ ਭਰਾਂਵਾਂ ਵੱਲ ਝੁਕਦੇ
       ਮਨ ਦੇ ਪੱਲੜੇ ਨੂੰ ਝੱਲਿਆ
       ਉਨਾਂ ਲਈ ਕੰਮ ਕੀਤੇ
       ਤੇ ਬਦਲੇ ‘ਚ ਪਿਤਾ ਦੀਆਂ ਝਿੜਕਾਂ ਝੱਲੀਆਂ

ਮਾਂ-
       ਕਦੇ ਪਿਉ ਦੀਆਂ ਮਨਮੱਤੀਆਂ ਝੱਲਦੀ
       ਕਦੇ ਔਲਾਦ ਦੀਆਂ ਸੁਣਦੀ
       ਪਰ ਸਦਾ ਸਬਰ ਦੇ ਬੂਹੇ ਬੰਦ ਹੀ ਰੱਖਦੀ
       ਕਿਸੇ ਨੂੰ ੳੁੱਚਾ ਨਾ ਬੋਲਦੀ
       ਉਸਦੇ ਬੋਲ ਨਹੀਂ
       ਸਿਸਕੀਆਂ ਹੀ ਸੁਣੀਆਂ ਨੇ ਕੰਧਾਂ ਨੇ
       ਕੰਧਾਂ – ਜਿਨਾਂ ਨਾਲ ਉਹ ਕੱਲੀ ਗੱਲਾਂ ਕਰਦੀ

       ਕੰਮ ਪਤੀ ਨੇ ਵਾਹਵਾ ਕੀਤਾ 
       ਦਿਨ ਰਾਤ ਕਦੇ ਨਹੀਂ ਦੇਖਿਆ
       ਮੰਨਦੀ ਹਾਂ
             ਤੇ ਅੱਗੋਂ ਦੁੱਗਣਾ ਵੀ ਕਰਦੀ ਹਾਂ
       ਪੁੱਛਦੀ- ਮੈਂ ਕੀ ਗਲਤੀ ਕੀਤੀ
               ਕਿ ਮੇਰਾ ਕੀਤਾ ਸੱਭ ਕੁੱਝ
               ਪਤੀ ਦੇ ਕੀਤੇ ਅੱਗੇ ਤੁੱਛ ਹੋ ਜਾਂਦਾ
               …      …     …     …

ਪਿਤਾ ਜੋ ਹੁਣ ਭੁੱਬੀਂ ਰੋਂਦਾ
       ਇਕੱਲਾ ਹੋ ਗਿਆ
       ਸਾਰੀ ਉਮਰ ਹੁਕਮ ਚੜਾਇਆ ਤੇ ਮਨਵਾਇਆ
       ਅੱਜ ਹੁਕਮਰਾਨ ਦਾ ਹੁਕਮ ਇੱਕਲਾ
       ਬਿਲਖ ਰਿਹਾ ਹੈ….  …  …

ਪਰਬਤ ਮਾਤਾ

ਮਈ 12, 2009

ਪਰਬਤ ਮਾਤਾ

ਮਾਂ ਤੇਰੀਆਂ ਬਰਫੀਲੀਆਂ ਚੋਟੀਆਂ ‘ਚੋਂ
ਵਗੇ ਗੰਗਾ ਮਾਈ
ਵਗਣ ਅਨੇਕਾਂ ਨਦੀਆਂ
ਪਲਣ ਅਨੰਤ ਜੰਗਲ ਬੇਲੇ
ਜੀਵ ਜੰਤੂ
ਤੇਰੀਆ ਚੋਟੀਆਂ ਤੋਂ ਚੱਲੇ
ਸਭ ਲਈ ਅੰੰਿਮ੍ਰਤ ਧਾਰਾ
ਵਗਣ ਹਵਾਵਾਂ
ਨਸ਼ਿਆਉਂਦੀਆਂ

ਅਸੀਂ ਤੇਰੇ ਅਸੱਭਿਅਕ ਤੇ ਹੰਕਾਰੀ ਬੱਚੇ
ਰਤਾ ਨਹੀਂ ਝਿਜਕਦੇ
ਤੇਰੀ ਦੇਹ ਤੇ ਕਰਨੋਂ ਅਨਰਥ
ਖਾ-ਪੀ ਕੇ ਸੁੱਟਦੇ ਪਲਾਸਟਿਕ
ਤੇ ਹਰ ਤਰਾਂ ਦਾ ਗੰਦ ਮੰਦ
ਕਰਦੇ ਅਨੰਤ ਹੀਲੇ
ਪਿਘਲਾਉਣ ਲਈ ਤੇਰੀਆਂ
ਚੋਟੀਆਂ ਦੁੱਧ ਚਿੱਟੀਆਂ
ਪਾਣੀਆਂ ਵਿੱਚ ਘਾਣੀਆਂ
ਕੱਟ ਕੱਟ ਰੁੱਖਾਂ ਨੂੰ
ਤੇਰੇ ਜਿਸਮ ਤੋਂ ਰੰਗ ਬਰੰਗੇ ਕੱਪੜੇ ਲਾਹੇ
ਬਾਲੀ ਅੱਗ ਪਰਦੂਸ਼ਣ ਵਾਲੀ
ਫੈਲਾਇਆ ਧੂੰਆਂ ਧੁੰਦੂਕਾਰ
ਰੁੱਖ ਜੀਵ ਤੇ ਮਾਨਸ ਸਾਰੇ
ਕਰਦੇ ਹਾਹਾਕਾਰ…

ਅਸੀਂ ਤੇਰੇ ਬੱਚੇ
ਅਕ੍ਰਿਤਘਣ  ਤੇ ਬਦਕਾਰ…  …

ਅਲਵਿਦਾ ਮਾਂ !

ਮਈ 12, 2009

ਅਲਵਿਦਾ ਮਾਂ !

ਸਵਰਨਜੀਤ ਸਵੀ 

ਮਾਂ ਤੈਨੂੰ ਵਿਦਾ ਕਰਨ ਲਈ
ਲਿਜਾਂਦਿਆਂ ਤੇਰੀ ਚਾਰ ਤੱਤਾਂ ਦੀ ਦੇਹ
ਨਾਲ ਨਾਲ ਤੁਰ ਰਿਹਾ ਸੀ
ਤਾਉਮਰ ਤੇਰੇ ਦਿੱਤੇ ਪਿਆਰ ਦਾ
        ਪਲ ਪਲ ਕਦਮ ਦਰ ਕਦਮ
ਤੇ ਯਕੀਨ ਕਰਨ ਲਈ
ਕਿ ਤੂੰ ਜਾ ਰਲਣਾ ਹੈ ਪੰਜ ਤੱਤਾਂ ‘ਚ
ਪਾਣੀ ਦਾ ਘੜਾ ਲੈ ਕਰਦਾ ਹਾਂ ਤੇਰੀ ਪਰਕਰਮਾ
ਟੁੱਟਦੇ ਘੜੇ ਦੀ ਆਵਾਜ਼
ਤੇ ਡੁੱਲਦੇ ਪਾਣੀ ਨਾਲ
ਯਾਦ ਆਇਆ ਵਿਆਹ ਵੇਲੇ
ਖੁਸ਼ੀ ‘ਚ ਖੀਵੀ ਹੋ ਹੋ
         ਮੇਰੇ ਸਿਰੋਂ ਵਾਰ ਕੇ ਪੀਣਾ ਪਾਣੀ
………………
ਤੂੰ ਜਿਸ ਨਿੱਘੀ ਛਾਤੀ ਨਾਲ ਲਾ ਲਾ ਰੱਖਦੀ ਸੀ ਮੈਨੂੰ
ਉਸ ਨਰਮ ਦੇਹ ਤੇ ਰੱਖ ਰਿਹਾ ਹਾਂ
ਲੱਕੜ ਦੇ ਮੱਣ ਮੱਣ ਭਾਰੇ ਮੁੱਢ
ਤੇਰੀ ਚਿਤਾ ਨੂੰ ਦੇਣ ਲੱਗਿਆਂ ਅਗਨ
ਮੈਂ ਕੰਬਦੇ ਹੱਥਾਂ ਨੂੰ ਸਮਝਾਉਂਦਾ ਰਿਹਾ
ਕਿ ਤੂੰ ਵੱਡਾ ਪੁੱਤ ਹੈਂ ਮਾਂ ਦਾ
           ਹੁਣ ਵੱਡਾ ਹੋ ਜਾ
ਤੇਜ਼ ਲੱਪਟਾਂ ਕੋਲੋਂ ਸੱਭ ਚਲੇ ਗਏ ਦੂਰ
ਤੇ ਮੈਨੂੰ ਲੱਪਟਾਂ ਦੇ ਸੇਕ ‘ਚੋਂ ਵੀ
         ਤੇਰੀ ਗੋਦ ਦਾ ਨਿੱਘ ਮਿਲਦਾ ਰਿਹਾ
         ਬੁੱਕਲ ਦੀ ਛਾਂ ਮਿਲਦੀ ਰਹੀ
ਤੇ ਸਵੇਰੇ
ਚੁਗ ਰਿਹਾ ਸਾਂ ਅਸਤੀਆਂ
ਪਾ ਰਿਹਾ ਸਾਂ ਦੁੱਧ ਵਾਲੇ ਬੱਠਲ ਵਿਚ
ਫਿਰ ਧੋ ਕੇ ਕੱਢ ਰਿਹਾ ਸਾਂ
ਤਾਂ ਮਨ ‘ਚ ਤੁਰੀ ਫਿਰਦੀ ਸੀ ਤੂੰ
ਗਲੀ ‘ਚੋਂ ਚੁੱਕ ਭਰਤ ਦਾ ਟੋਕਰਾ
ਸਿੱਟ ਰਹੀ ਸੀ ਡੂੰਘੇ ਪਲਾਟ ਵਿਚ
         ਅੱਖਾਂ ‘ਚ ਘਰ ਦੇ ਸੁਪਨੇ ਵਸਾਈ
ਤੇਰੇ ਉਹ ਸਖਤ ਜਾਨ ਹੱਡ
         ਤੇ ਤੇਰਾ ਹੱਠ
         ਸਭ ਕੁੱਝ ਠੀਕ ਕਰ ਲੈਣ ਦਾ
         ……………………
ਹੱਥਾਂ ‘ਚ ਤੇਰੇ ਸਿਰ ਦਾ ਇੱਕ ਹਿੱਸਾ ਆਇਆ ਹੈ
ਮਾਸੀਆਂ  ਮਾਮੀਆਂ  ਭੈਣਾਂ ਕਹਿੰਦੀਆਂ
      ਆਹ ਦੇਖ ਬਿੱਧ ਮਾਤਾ ਦੇ ਲੇਖ
      ਜਿਵੇਂ ਹਸਪਤਾਲ ‘ਚ
      ਆਕਸੀਜਨ ਦਿੰਦਿਆਂ
      ਮੌਨੀਟਰ ਤੇ ਹਰੀ ਲਾਈਟ
      ਉੱਪਰ ਹੇਠਾਂ ਗ੍ਰਾਫ ਬਣਾਉਂਦੀ
ਉਵੇਂ ਹੀ ਕੁੱਝ ਲਿਖਿਆ ਸੀ
ਬਿੱਧ ਮਾਤਾ ਨੇ ਸ਼ਾਇਦ
      ਤਾਂ ਹੀ ਸਾਰੀ ਉਮਰ ਤੂੰ
      ਜੇ ਦੋ ਦਿਨ ਖੁਸ਼ੀ ‘ਚ ਉਡੂੰ ਉਡੂੰ ਕਰਦੀ
      ਫਿਰ ਕਈ ਦਿਨ ਖਾਮੋਸ਼ ਅੱਖਾਂ ‘ਚ
      ਉਦਾਸੀ ਜਹੀ ਤੈਰਦੀ ਰਹਿੰਦੀ ਤੇਰੇ
ਕਿੰਨੀ ਕੰਜੂਸੀ ਨਾਲ
ਖੁਸ਼ੀ ਲਿਖੀ ਸੀ
      ਬਿੱਧ ਮਾਤਾ ਨੇ ਤੇਰੇ ਲਈ
ਇੱਕ ਪਲ ਖੁਸ਼ੀ ਦਾ ਕੀ ਦਿੰਦੀ
       ਲੱਖਾਂ ਪਲ ਬੰਨ੍ਹ ਦਿੰਦੀ ਕਸ਼ਟ ਦੇ
ਦੂੱਖਾਂ ਦੇ ਪਹਾੜ ਬੁਣਦੀ ਰਹਿੰਦੀ
ਤੇਰੇ ਲੱਈ ਬਿੱਧ ਮਾਤਾ!
…………

ਹੁਣ ਬੈਠਾ ਹਾਂ
ਗੰਗਾ ਦੇ ਤੇਜ ਪਾਣੀ ਅੱਗੇ
ਲੈ ਕੇ
ਪੂਰੀ ਜ਼ਿੰਦਗੀ ‘ਚੋਂ ਬਚੇ
       ਦੋ ਕਿੱਲੋ ਹੱਡੀਆਂ ਦੇ ਚਾਰ ਕੁ ਬੁੱਕ
ਲਿਖਵਾ ਕੇ ਅਇਆ ਹਾਂ
ਪੁਰੋਹਿੱਤ ਦੀ ਵੱਹੀ ਤੇ
          ਤੇਰਾ ਨਾਮ
          ਆਪਣੀਆਂ ਸਾਰੀਆਂ ਪੀੜੀਆਂ ਦੇ ਨਾਲ
ਪੁਰੋਹਿੱਤ ਨੇ ਦੱਸਿਆ ਹੈ
ਕਿ ਕਿਵੇਂ ਤੇ ਕਦ
          ਪਿਛਲੀਆਂ ਪੀੜੀਆਂ ਆਈਆਂ ਏਥੇ
          ਤੇ ਪਹੁੰਚੀਆਂ ਹਰ ਕੀ ਪੌੜੀ

ਮੈਂ ਬੁੱਕ ਬੁੱਕ ਕਰਕੇ
          ਵਹਾ ਰਿਹਾ ਹਾਂ ਅਸਤੀਆਂ
          ਹਰ ਕੀ ਪੌੜੀ ਦੇ ਤੇਜ਼ ਪਾਣੀ ‘ਚ
ਪੁਰੋਹਿਤ ਕਹਿੰਦਾ
ਇੱਥੇ ਅਸਤੀਆਂ ਅੱਠਤਾਲੀ ਘੰਟਿਆਂ ‘ਚ
ਰੇਤ ਬਣ ਜਾਂਦੀਆਂ
ਵਹਿ ਜਾਂਦੀਆਂ ਨੇ ਗੰਗਾ ਮਾਈ ਦੇ
ਵਰਦਾਨ ਭਰੇ ਪਾਣੀ ‘ਚ
……………
ਸੋਚ ਰਿਹਾਂ ਮਾਂ
ਕਿ ਤੂੰ ਕੁਝ ਪਲ ਹੈਂ ਮੇਰੇ ਹੱਥਾਂ ‘ਚ
ਫਿਰ ਪਤਾ ਨਹੀਂ ਕਿੱਥੇ ਹੋਵੇਂਗੀ
ਤੂੰ ਵੀ ਜਾ ਰਲੇਂਗੀ
ਸਦੀਆਂ ਤੋਂ ਚੱਲੀ ਆ ਰਹੀ
ਟਿਮਟਿਮਾਉਂਦੇ ਤਾਰਿਆਂ ਦੀ ਲੰਬੀ ਕਤਾਰ ਵਿੱਚ

ਤੂੰ ਨਹੀਂ
ਤੇਰੀ ਨਿੱਘੀ ਬੁੱਕਲ ਦਾ
         ਅਹਿਸਾਸ ਰਹਿ ਜਾਵੇਗਾ
ਇਨ੍ਹਾਂ ਹੱਥੋਂ ਨਿਕਲਦੀਆਂ 
         ਅਸਤੀਆਂ ਤੋਂ ਬਾਦ
         ਮੇਰੇ ਹੱਥਾਂ ‘ਚ…
         …………
         …………

ਨਾਨਕਾ

ਮਈ 12, 2009

 
ਨਾਨਕੇ ਪਿੰਡ ਦੀ
ਪਗਡੰਡੀ ਟੱਪਦਿਆਂ ਹੀ
ਬੱਚੇ ਬੱਢੇ ਜਵਾਨ ਹਮਉਮਰ ਸੱਭ
ਮਾਮੇ  ਮਾਮੀਆਂ  ਮਾਸੀਆਂ ਨਾਨੇ ਨਾਨੀਆਂ
ਵਿੱਚ ਤਬਦੀਲ ਹੋ ਜਾਂਦੇ

ਮਨ ‘ਚ ਸੱਭ ਤੋਂ ਪਹਿਲਾਂ
ਨਾਨੀ ੳਭਰਦੀ ਹੈ
      ਮੇਰੀ ਨਾਨੀ-ਘੜਾਨੀ
      ਖੁਸ਼ੀਆਂ ਦਾ ਦਰੁਲੱਭ ਖਜ਼ਾਨਾ !

ਹੱਸਦੀ ਖੇਡਦੀ
ਡੰਡੇ ਲੈ ਕੇ ਮਗਰ ਭੱਜਦੀ
ਲਾਡ ਲਡਾਉਂਦੀ
ਘਿਉ ਸ਼ੱਕਰ ਖੁਆਉਂਦੀ

ਫਿਰ ਨਾਨਾ ਤੇ ਮਾਮਾ ਆਤਮਾ
ਜਦੋਂ ਵੀ ਦੇਖੋ ਭੱਠੀ  ‘ਚੋਂ ਗਰਮਾ-ਗਰਮ ਲੋਹਾ ਕੱਢ
ਨਾਨਾ ਸੰਨ੍ਹੀ ‘ਚ ਫੱੜਕੇ ਆਰ੍ਹਨ ਤੇ ਰੱਖਦਾ
ਮਾਮਾ ਘੱਣ ਲੈ
        ਉਹਨੂੰ ਕੁੱਟਦਾ ਤੋੜਦਾ ਮਰੋੜਦਾ
        ਪਤਾ ਨਹੀਂ
        ਕਿਹੜੇ ਜਨਮਾਂ ਦੀ ਦੁਸ਼ਮਣੀ ਕੱਢਦੇ

ਫਿਰ ਤੋੜ ਮਰੋੜ ਕੇ
ਕਦੇ ਫਾਲ੍ਹਾ
ਕਦੇ ਦਾਤੀ
ਕਦੇ ਤਵੀ
ਕਦੇ ਛੈਣੀ
        ਹੋਰ ਪਤਾ ਨਹੀਂ ਕੀ ਕੀ ਬਣਾਉਂਦੇ ਰਹਿੰਦੇ

ਨਾਨਾ ਤਾਂ ਡਾਕਟਰੀ ਵੀ ਕਰਦਾ
ਕਿਸੇ ਦਾ ਦੰਦ ਹੁੰਦਾ ਕੱਢਣ ਵਾਲਾ ਦੁਖਦਾ
ਆ ਬੈਠਦਾ
ਨਾਨਾ ਜਬ੍ਹਾੜੇ ‘ਚ ਪਾ ਜਮੂਰ
ਦੰਦ ਦਾੜ ਜੋ ਵੀ ਦੁਖਦਾ
ਕੱਢ ਅਗਲੇ ਦੇ ਹੱਥ ਫੜਾਉਂਦਾ
ਨਾ ਕੋਈ ਆ..ਹ ਨਾ ਊ..ਹ
ਬੱਸ ਹੱਥ ‘ਤੇ ਪਏ
       ਅੱਧ ਗਲੇ ਦੰਦ ਨੂੰ ਦੇਖਦਾ
       ਤੇ ਉੱਠਕੇ ਤੁਰ ਜਾਂਦਾ
       ਤੇ ਇੰਜ ਹੀ ਇੱਕ ਦਿਨ ਨਾਨਾ ਤੁਰ ਗਿਆ

ਫਿਰ ਲਾਲ ਰੰਗ ਦੀਆਂ ਲਾਟਾਂ ਮੂਹਰੇ
ਭੱਖਦੇ ਚਿਹਰੇ ਵਾਲਾ ਮੇਰਾ ਮਾਮਾ
ਕੁੱਟਦਾ ਤੋੜਦਾ ਮਰੋੜਦਾ ਰਿਹਾ ਲੋਹੇ ਨੂੰ
ਮਾਮਾ ਕੰਮ ਕਰਦਾ ਤਾਂ ਲੋਕ ਕਹਿੰਦੇ
ਗਰਮ ਲੋਹਾ ਤਾਂ ਅਤਮੇ ਮੂਹਰੇ ਰੋਂਦੈ…
          ਜਿਉਂ ਕਸਾਈ ਮੂਹਰੇ ਬੱਕਰਾ
ਤੇ ਮਾਮਾ ਕਹਿੰਦਾ
ਆਤਮੇ ਦੀ ਕੀਤੀ ਵੈਲਡਿੰਗ ਕੂਲ਼ੀ ਗੱਲ੍ਹ ਅਰਗੀ
ਭਾਵੇਂ ਕੋਈ ਜੀਭ ਫੇਰ ਲਵੇ ਸਾਰੀ ਟਰਾਲੀ ਤੇ
ਜ੍ਹਾ ਖਾਂ ਜੀਭ ਨੂੰ ਰੱੜਕ ਜਾਵੇ

ਤੇ ਇਉਂ ਹੀ
ਭਾਣਜੀ ਦੇ ਭੋਗ ਤੇ ਭੁੱਬੀਂ ਰੋਂਦਾ ਮਾਮਾ
ਅਗਲੇ ਦਿਨ ਪਿੰਡ ਜਾਂਦਾ ਹੀ ਚਲੇ ਗਿਆ
                ਬਿਨਾਂ ਰੱੜਕੇ ਜੀਭ ਤੇ

ਛੱਡ ਗਿਆ ਪਿੱਛੇ ਇਕੋ ਹੀ ਗੱਲ
        ਬਈ ਆਤਮੇ ਮੂਹਰੇ ਤਾਂ ਲੋਹਾ ਰੋਂਦਾ ਸੀ ਰੋਂਦਾ
        ਕੰਮ ਤਾਂ ਉਹਦੇ ਮੂਹਰੇ ਭੱਜਿਆ ਫਿਰਦਾ ਸੀ
        …              …              …